朱敏瀚鬧喊JW 知衰道歉
入戲太深 講嘢太狠
周嘉洛、陳瀅、朱敏瀚（朱仔）及王灝兒（JW）2021年拍無綫劇《痞子殿下》成為好友，之後再次攜手演出《痞子無間道》，但友情竟然起暗湧！JW自爆被朱仔鬧喊，朱仔認衰道歉：「係我態度唔好。」JW明白大家對事不對人，笑言無損友情，希望再合作。
採：記者 梁靜儀 攝：黃艾力
4人合作《痞子殿下》成為最佳拍檔，今次再度攜手演出《痞子無間道》，竟然發生拗撬，大家都變得執着及各持己見！朱仔承認因說話太狠鬧喊JW：「今次大家講嘢都直接咗，冇修飾，加上拍攝時間緊迫，好多時講嘢會直接到Point，做嘢要快狠準，但因為太狠，令到JW唔開心。」他向JW道歉：「我承認自己態度唔好，做錯咗，鬧喊你。」
JW重提舊事時語帶不忿說： 「佢態度惡劣，雖然冇爆粗，除咗講嘢直接，仲好入戲，唔開機都仲喺戲入面。（佢太入戲？）係啦，係好入戲！我好尊重佢，只係我個人比較敏感，變咗佢可能唔太客氣，佢一路試探我嘅底線，都知我嬲。」她續稱：「拍攝時大家都好大壓力，加上睡眠不足，但又想做好件事，但我演戲經驗比較少，所以要時間適應。」問到朱仔事後可有向她斟茶認錯？JW笑言：「大家拍完當日都有傾番。」
朱仔坦言首次整喊人，不過大家的友情因此加深。問JW下次還會否與朱仔合作？她說：「都想再合作，我入TVB就係想演戲，可以同佢哋3個合作，我好幸運。」她明白大家對事不對人，朋友就是這樣。
周嘉洛與陳瀅更有火花
陳瀅認為演喜劇很難，要成功有很多因素，除了演出節奏、對手配合外，還有播映時間，都會令劇集是否受歡迎。她自言為了搞笑演出豁出去，完全沒包袱。JW亦稱沒歌手包袱，只擔心自己的音調及誇張演出，會否令觀眾接受。
周嘉洛表示今次與陳瀅合作更有火花，因對方經常出其不意，令他接不上對白。提到他與朱仔有咀戲，兩人齊聲表示不抗拒，周嘉洛笑言：「我係專業演員，任何唇都係一塊唇，拍完後亦都冇愛上朱仔。」朱仔亦笑言不會愛上周嘉洛，反而加深兄弟情。
