劉青雲認後輩 難與許冠文比較
爭影帝一定要有信心
劉青雲、莫文蔚和韓國女歌手CL昨日出席名錶活動，主持醒獅點睛儀式。在兩大電影頒獎禮皆獲提名「最佳男主角」的青雲表示有一定信心，但作為後輩的他不敢視前輩許冠文為勁敵。莫文蔚透露已向啟德體育園申請表演場地。
劉青雲透露第一隻收藏的手錶是太太郭藹明多年前送的生日禮物，兩人除了有情侶錶，亦不介意穿情侶裝。提到他憑電影《爸爸》同時入圍《金像獎》及《亞洲電影大獎》「最佳男主角」，問到有否信心？他笑言：「每次都俾人問有冇信心，信心一定要有，對自己冇信心，又點可以要求人哋對你有信心；但點樣釋放信心就要思考，唔可以畀人感覺驕傲，若然攞唔到獎俾人問感受又要點答呢？所以無論結果係點都要對自己有信心。但我唔想大家用『對手』形容入圍者，因為講到大家好似敵對咁，大家都係香港電影一分子，仲有來自唔同國家嘅演員角逐，有份入圍都有一定水準。」
莫文蔚擬啟德體育園開騷
問到可會視許冠文為最大勁敵？青雲說：「許冠文係我好尊重嘅電影工作者，亦係喜劇泰斗，佢拍過好多喜劇都有好成績。佢喺《破·地獄》演得好出色同賣座。但唔好話係最強對手，我好難同佢比較，佢係電影界大大大前輩，而我係後後後後輩。」對於黃子華未能入圍金像獎「最佳男主角」，青雲坦言：「好可惜，佢演得唔錯，但呢個係選擇上嘅問題，我相信佢絕對有機會再獲提名。佢係前無古人，後無來者。我拍咗咁多年戲，加起嚟（票房）都冇佢咁高，講笑啫，都有嘅。」
莫文蔚透露有申請在啟德體育園舉行巡唱：「啟德喺各方面同呢個騷都好配合，係Perfect！不過聽講今年嘅檔期已經爆滿。」問到老公是否每次都會陪她巡演？她表示：「的確會，因為老公順便可以學普通話。」並笑指老公現時的普通話可能比現場記者好。
