否認做霆鋒個唱嘉賓 譚輝智：我連飛都冇
古淖文、譚輝智、黃嘉雯與倪樂琳等昨日到荃灣出席3月8日舉行的《博愛歡樂傳萬家》記者會，古淖文透露屆時會與3位「聲夢」小妹妹載歌載舞，譚輝智則扮《老夫子》其中一個角色，在節目上玩遊戲。提到有傳譚輝智獲狄波拉青睞，有機會被安排在謝霆鋒的啟德主場館演唱會做嘉賓，他立即否認，並稱沒收到邀請：「我連飛都冇呀！應該好多人搵拉姑買飛，所以我完全唔敢麻煩佢，不過可以試吓隔空𢱑飛，有一張飛已經心滿意足。」
問到若真的有機會擔任暖場嘉賓，可會願意？在旁的古淖文搶答：「我代佢答，梗係得啦！」譚輝智則稱：「霆鋒係完全另外一個層次，加上佢已經好多年冇開騷，所以我可以喺台下做觀眾已經心滿意足。」
