鳳凰墨城 殘兵混戰捱「細」界
澳職第21輪賽事，尾三威靈頓鳳凰主場對第6位墨爾本城。墨爾本城質素、往績及狀態都有一定優勢，不過今仗卻面對嚴重傷兵問題，打擊爭勝機會。考慮到雙方近況及入球能力都相當一般，對賽往績亦少波入，推介[2.5]細盤。（myTV Super周五2:30pm直播）
威靈頓鳳凰近8場聯賽只贏一場，當中半數零入球，今仗有中場高拿高夫斯基及前鋒加比爾洛迪古斯養傷，即使主場出擊亦難睇好；墨爾本城作客能力遠遜主場，近6場作客3和3負未贏過，亦有半數零入球。何況客軍今仗殘陣出擊，後衛尼高夫斯基、王牌中場烏加高域、中場阿歷山大盧彭尼、占士捷高、尤拿坦高漢及前鋒納博特齊缺陣，隨時要起用17歲澳洲出生的華裔中場小將黃振文（圖）擔正。兩軍近3次對賽總入球全部在兩球或以下，近4次對賽作客一方都無法入波，預期今仗同樣難有大交易產生。
