Bob新目標 做劇集男一
圓夢紅館開棟篤笑
林盛斌（Bob）將於3月7日首登紅館舉行棟篤笑《The Bobfather Finale 2025》，他直認有票房壓力：「我唔係周杰倫、陳奕迅、劉德華、謝霆鋒，係就即刻賣晒啲飛。」Bob訂下今年新目標，會向TVB高層自薦拍喜劇當「男一」，不介意雙男主角，希望日後可以與孫兒講威水史。
文：梁靜儀 攝：黃艾力
10年前Bob人生首個棟篤笑《Bob's Up》在伊館舉行，6年後轉戰九展Star Hall舉行第2次棟篤笑《The Bobfather 2021》，由於反應理想，之後更移師到吉隆坡、澳門、內地多個城市巡演，更衝出亞洲，遠赴阿姆斯特丹、倫敦、多倫多、溫哥華、三藩市和洛杉磯演出，最終回到香港紅館演出，為其棟篤笑演出完美落幕。
紅館是不少藝人趨之若鶩的朝聖地，入行22年的Bob終於登上紅館開棟篤笑，之前在紅館舉行棟篤笑的藝人只有黃子華、許冠文、張達明、林海峰。Bob視今次登紅館是演藝事業上一個很重要的里程碑，也是一個越級挑戰：「有啲人問我到底做幾多場？有得做一場已經好好，今次講緊喺紅館開3面台，差唔多有7,000個觀眾。無論係我演繹、內容同觀眾交流，都係好大嘅課題。」
開心票房成績理想
Bob表示：「有個朋友幾年前已睇我嘅棟篤笑，今次佢買完飛同我講『今次入場唔係睇你演出，而係想見證你喺紅館舞台升上嚟嗰一刻』。」Bob坦言入行以來，一直很期待升上紅館舞台的一刻。至於票房問題，他指上周終有好消息，貴價飛及平價飛均售罄，現只餘下小量飛。
在紅館開騷成就解鎖後，Bob訂下今年新目標，就是做電視劇男一：「尤其係TVB劇集男主角，日後可以同啲孫講番，都係幾威水嘅事！」並乘機向TVB高層自薦：「希望珍姐（曾勵珍）、佳導（鍾澍佳）、總經理（曾志偉）畀啲機會啦，我唔介意雙男主角，如果驚我孭唔到個劇，可以拍多個，『雙料視帝』張振朗拍我都得㗎！女主角係唔係視后都冇所謂，『飛躍』嗰班已經好好，總之拍一齣廿集電視劇。」
