【地表最強】紅逸舍添食冇問題
兆 文
第二場第四班2200米。「小飛俠」上季三歲已差點在田草1800建功，該仗初跑該路程，快步速全程跟第二位並非有利，最後僅以馬頸位不敵唔簡單。接戰扳到潘頓捧到21蚊充信心，可是質新馬尚未踏上穩定期，縱使發揮冇錯卻只跑梗頸四。一如大多蔡廄質新馬，「小飛俠」今季一早復課卻遲遲上陣，首戰爭谷草1650熱身，接戰谷草1800票冷繼續試兵，難得遇超快步速不利也跑近，上仗改攻田草2000啱跑，卻遇上「銀皇興標」搞搞震以致放得快，仍能頂到尾打開勝門，而且亞軍「發財秘笈」接戰補中水準極高。仍在四班出戰好着數，氣量充沛路程愈長愈好，增程跑2200只會更有把握。
第九場第三班1650米「紅逸舍」自上季轉投韋廄後，表現儼如脫胎換骨，除了219場次因入彎時嚴重受阻輸得較遠，其餘賽前演出準繩可靠。以前仗出戰沙田直路賽為例，雖然一席亞軍所負距離較遠，但頭馬「水晶酒杯」賺了慢步速之餘，接戰可力拚現役97分的「華麗再勝」，仲要「紅逸舍」該仗要到最後200米才找到空位發力衝刺，呢席亞軍水準極高。所以上仗復爭強項谷草同程，更有快步速之助，熱捧下順利補中；「紅逸舍」在跑馬地百萬挑戰盃仍有一爭，戰意毋須置疑，負磅比起上仗更輕一磅，對手亦大多為蹄下敗仗，繼續由布文執韁，人馬合拍，篤定再下一城。
