讚嘉玲自律有進取心 黃子華笑言打一萬分
香港文匯報訊 前晚（23日）一連58場舞台劇《香港式離婚》假香港演藝學院歌劇院圓滿落幕。黃子華、劉嘉玲連同一眾演員、編劇黃詠詩（阿詩）、導演陳淑儀及監製王耀祖、周怡、黃懿雯一同謝幕，現場掌聲如雷。
黃子華感謝台前幕後工作人員，提到舞台劇需要大量人力物力，全賴大家每晚盡心盡力，加點運氣，才能順利演出，故該感激時便要好好感激。他感觸表示：「其實我晚晚都想多謝呢個人，就係我隔籬呢位劉嘉玲。我哋第一次合作，講真你哋要我評價劉嘉玲，滿分係一百分，我會畀一萬分。」
劉嘉玲聞言後驚訝不已，即擁着子華道謝。子華指嘉玲為了這次演出付出了極大心力，令人敬佩，不僅節食減了8磅，還刻意限制自己少飲酒。子華大讚嘉玲：「我哋做演員都鍾意改善自己嘅戲，但改善到某個地步，都會心諗『唔好搞我啦，導演，畀我自由發揮吓啦。』我記得最後排練嗰日，阿詩仲畀我張紙，我即刻崩潰 ：『我唔識做喇！最後一日你仲要我改？』但劉嘉玲就唔同，由第一日開始到最後一日排練， 每日都不停問：『冇Notes（改進建議）畀我嘅？畀我多啲Notes啦！』佢真係不斷追求進步，同時又好自律。」
子華又分享，即使演出如火如荼、大家累透時，嘉玲仍然抽時間為每個人準備聖誕禮物。說到這裏，子華忍不住讚嘆：「呢個咩演員嚟㗎？」然後再補充：「所以無論台前定台後，佢都值得一萬分！」
子華轉頭笑着對編劇黃詠詩說：「你好難再搵到咁強嘅Laura（劉嘉玲飾）喇！你個戲以後會唔會再重演？好難，因為嘉玲帶住佢幾十年喺銀色生涯累積落嚟、不能言喻嘅勢力去演呢個角色。呢啖Laura味，你喺香港真係搵唔到第二個。」
嘉玲稱4個月演出似禪修
嘉玲笑說：「好多謝子華搵我做呢個戲，由綵排到𠵱家四個幾月，我經歷咗一段好美妙嘅時光。我唔係專業舞台劇演員，所以一路都追住導演畀我Notes，我唔想拖累成個戲。」她感觸地說：「其實呢四個幾月對我嚟講，好似一場禪修。我要學識點樣活在當下，我一路都喺度學緊。呢段時間對我嚟講好特別，我會好珍惜。」
編劇黃詠詩提到自己是讀演員（表演系）出身，但因為屋企嘅離婚經歷，形成咗一個比較特別嘅人格。阿詩提到Covid期間，覺得自己「好陰公」時，「有個人WhatsApp我，問我可唔可以做《香港式離婚》，佢想將呢個作品帶畀更多觀眾。」她感激黃子華，並藉此勉勵觀眾：「𠵱家唔覺得係Curse（詛咒）嘅嘢，可能會係一份禮物嚟。」阿詩隨即驚喜宣布，將於今年5月在香港演藝學院重演其經典個人獨角戲《破地獄與白菊花》，「希望到時可以再見到大家，畀我氹吓你哋開心！」
