羅馬復仇戰 輾碎波圖
雲伯伯領軍 重返高峰
歐霸盃附加賽次回合重頭戲，意甲羅馬主場對葡超波圖。首回合波圖主場賽和1:1，今仗勝方將晉身16強淘汰賽，可能對手將是西甲畢爾包及意甲拉素，羅馬上下都渴望能夠與拉素合演意國首都打吡。球隊歷來多次歐洲賽遭波圖淘汰，難得今次在老帥雲尼亞里帶領下處於最佳狀態，矢志擊退衰落中的葡超對手。羅馬主場讓半/一撐上盤。（NOW 643台周五1:45am直播）
羅馬近年歐洲賽戰績甚佳，21-22年捧得歐協聯冠軍，22-23年歐霸盃獲亞軍。不過自上季解僱功勳主帥摩連奴後便陷入混亂，踏入今季開季仍一直動盪，已先後炒掉迪羅斯及祖歷兩任主帥。直至去年11月中，邀得73歲老帥雲尼亞里第3度出山救亡，只花不足一個月已經帶領球隊重返正軌！近9場意甲不敗共搶21分，是同期成績最好球隊。上周末作客帕爾馬雖輪換留力今仗，但仍小勝1:0兼壓着對手狂攻，全場射門達16次，若非主隊日本門將鈴木彩艷表現出色，入球絕不止一個。
歐霸主場惡 勝勢如虹
羅馬今屆歐霸開局不利，頭5輪只得一勝，但「雲伯伯」回歸卻幫助球隊重生！領軍於最後兩仗主場贏波取得附加賽資格，上周中首回合作客波圖，大部分時間佔得優勢並半場領先，直至下半場基斯坦迪被逐踢少個才被扳平，表現明顯在對手之上。羅馬踢歐霸主場戰績一向有保證，近16戰贏了13場，包括今屆近3場接連擊敗基輔戴拿模、布拉加及法蘭克福，3仗都保持零失球！羅馬歷史上對波圖戰績差：1981年歐洲盃賽冠軍盃、2016年歐聯附加賽及2018年歐聯16強，羅馬都被波圖淘汰，今次主場有超強決心復仇。
波圖一向是葡超班霸，但近年卻逐步走下坡，今季在國內已漸被士砵亭及賓菲加拋離。近26場歐洲賽淘汰賽只贏過5場，當中只有一場作客取得。今屆歐霸亦需要在最後一輪險勝特拉維夫馬卡比，才獲附加賽資格，除這場中立場勝仗外，波圖今屆歐霸另外3場作客1和2負。王牌射手奧摩洛迪安踏入今年在各項賽事都未入過波。加上首回合演出不濟，今夜作客羅馬睇低一線。
