背負視后頭銜 嘉欣壓力變動力
考慮人生大事 唔介意相睇
入行17年的龔嘉欣早前在《萬千星輝頒獎典禮2024》憑《企業強人》奪「最佳女主角」，她不諱言獎項是動力也是壓力，會推動自己更上一層樓。現年35歲的嘉欣開始考慮人生大事，不抗拒朋友做紅娘，希望有朝一日可以大大聲宣布好消息。
龔嘉欣擊敗大熱人選楊茜堯首度封后，事後引發不少爭議，她坦言見怪不怪：「當然每一個比賽或頒獎禮，最後個結果一定冇可能所有人都認同。」她認為能夠得獎有賴整個團隊合作，才能拍出一部好作品，並稱不相信因獎項影響跟楊茜堯的友情。
嘉欣2016年憑《幕後玩家》奪「最佳女配角」，2020年再憑《殺手》及《香港愛情故事》分別奪「最受歡迎電視女角色」以及「馬來西亞最喜愛TVB女主角」，如今榮升視后，可說完成了演藝大滿貫。她將獎座放在客廳中央的顯眼位置，覺得獎項是動力也是壓力：「個獎係畀自己一個鼓勵，係一個動力，亦都係一種壓力，因為孭住個頭銜唔容易，提醒自己以後一定要比以前更加花心思，唔可以令疼愛自己嘅人失望。」
好少主動出擊識男士
曾笑言當視后才考慮結婚的嘉欣，笑言可以開始考慮認識新朋友：「以前連同普通朋友食飯都未必有時間，依家可以考慮，去食吓飯，交個新朋友。（好姊妹有冇幫你做媒人？）冇，我唔抗拒朋友做媒人。」提到她與日籍甜品師拍檔松岡哲也傳緋聞，嘉欣強調對方是生意拍檔，又稱揀男友要大家方向一致，才能溝通：「你揀人時，人揀你，反而擔心自己太有衝勁，會令身邊人吃不消，我係開行Turbo啲人，所以最好同另一半一齊chur會開心啲。」
正值適婚年齡的嘉欣坦言要為自己好好打算，再拍拖都會以結婚為大前提。問到多久沒拍拖？她笑言：「唔特別講，相信時間合適，呢個人就會出現。（遇到合適對象會主動出擊？）好少會，因為唔知對方點諗，同埋唔會諗太多，咁會有壓力。」問到若再拍拖會否公開？她坦言想有一日可以大聲公布好消息：「因為係兩個人嘅事，開花結果先將好消息分享畀大家。」
