【豐力深作】幸運同行票哪來
黃子豐
今期有隻馬啲飛古怪到極，第四場隻「幸運同行」，由一開飛開始，就一直有飛，結果有啲朋友信試閘，呢隻馬試咗十課泥地閘，差不多次次包尾，加埋輸咗幾百個馬位。
如果你信賽績，呢隻馬喺香港跑咗兩季，就連獎金都未攞過，咁佢啲飛喺邊度嚟？因為佢有飛，所以我刻意細心研究咗下佢，發覺呢隻「幸運同行」，上季次次過百倍完全冇飛冇走勢。
「幸運同行」今季頭三場，一樣次次超過50倍，不過，169場「幸運同行」開始突然有飛，雖然當日一樣冇乜表現，但近兩場，隻馬真係開始有走勢了。大家乜都唔睇，單睇佢近兩次輸嘅馬位數目，的的確確，係來港後，輸得最近嘅兩次。
「幸運同行」今次突然轉跑泥地，而今期飛數又突然咁勁，反正今晚全泥夜宴亂到飛起，賽日佢回番上十幾倍，係有可搏之道，反正佢初跑泥地，確確實實係有好大變數，冷門可以試下。
