求「搣」甩正氣 黃智雯奸畀你睇
婚後保持少女心
去年大膽跳出十多年工作舒適圈的黃智雯，於新一年勇於接受新轉變和新挑戰。怕悶的她坦言不可以長時間在家做少奶奶，加上丈夫很支持她做演藝事業，故她可以無顧忌搏殺。她自認樣子太正氣，很想演大反派，希望讓觀眾知道她演什麼似什麼。
回顧去年，黃智雯感覺自己像經歷多個階段，始終離開了工作多年的TVB，需要一個適應期，她說：「一開始唔適應，就好似以前返工或返學，喺同一模式十幾年後，突然去咗比較自由自在嘅模式，係有啲唔慣。發覺原來自己係唔可以悶嘅人，我真係好怕悶！」沒有大公司庇蔭，她坦言難免緊張和擔心，幸好這段適應期只維持很短時間，因她做藝人就是要適應力強，才可與不同人合作。
2025年，黃智雯給自己一個目標，希望有一個突破她常規演出的機會：「希望遇到呢個角色畀我突破，現實中我係比較慢熱同怕醜，但演戲上我可以放飛自我，唔受規限去演出。」她再次強調自己怕悶：「我拍完劇係唔可以齋坐喺屋企，點都要出外搵嘢學。」記者笑指被她的「宅女」外表騙到，黃智雯說：「人愈大愈嚮往『宅』喺屋企嘅生活，能夠『宅』喺屋企即係代表有更多時間關注自己，都係為未來工作做準備嘅一部分。」
盼演更多舞台劇
問到現在的工作與在舊公司相比有什麼分別？她說：「依家我會畀自己壓力，因為以前拍劇都係前後3個月左右，來來去去都係見同一班人，已經有默契，唔使花時間熱身。但依家客串一場電影，都要極速進入電影世界，同新對手、新團隊交流，所以我會鞭策自己做好啲。」
近年對舞台劇有濃烈興趣的她自認仍是初哥，希望在未來日子有更多演出機會：「做舞台劇始終排練時間比較長，準備時間都好長。」她坦言希望演一次大反派，因她外表以往給人太正氣，根本不似壞人，加上電視尺度有限，不少女演員多數被定型為「賢良淑德」，故她希望可以突破自己。
榮升人妻後，黃智雯笑言仍保持少女心，可能因為她與老公都很獨立，會互相尊重對方和給予空間：「我覺得咁先可以長久維繫一段感情，我哋都係比較隨性嘅人，只係我身份唔同咗，完全唔覺得原來我哋結咗婚，哈哈！」
