衛詩雅初見「女兒」 學高棉語傳情
赴柬埔寨探訪特困家庭
出爐四料影后兼準人妻衛詩雅（Michelle）、導演劉偉恒偕妻子及兩名女兒早前隨宣明會到柬埔寨兩個社區進行探訪。經過一星期探訪和體驗後，眾人感受甚深。Michelle坦言此行最開心是首次與助養了6年的「女兒」見面，她更特別用手機翻譯學高棉語，寫了一張心意卡送給「女兒」。
衛詩雅自言性格感性，出發前公司同事已提醒她控制淚腺，但探訪時仍禁不住落淚，她說：「好似佢哋同我化新娘妝咁，有個年輕人得到支援，有機會學化妝，依家仲係當地嘅人氣化妝師，真係好感動，呢個係好有意義嘅新娘妝。」她透露最快樂行程是到宣明會即將完成發展目標的Baribour社區，與助養了6年的Chankoa見面：「見到佢已經眼濕濕，但又唔想嚇親佢，所以要忍住啲眼淚。我仲扮晒阿媽咁，叫佢拎啲功課出嚟睇吓，我即刻有啲唔好意思，因為我用當地嘅高棉語寫咗張卡畀佢，但係佢啲字靚過我好多。」她冧爆稱親自寫高棉語，是未婚夫的意思：「佢叫我唔好寫英文，用番當地語言容易啲溝通，我即刻開電話睇住個翻譯嚟抄。」
準備做「5孩之母」
Michelle希望將來能與未婚夫再來探訪：「希望15年後，我再返嚟探佢哋，見證佢哋嘅改變。」她坦言首兩天探訪特困家庭時，感覺他們很害怕：「佢哋唔敢同你傾偈，連眼神接觸都唔敢。但係喺後面已經發展完嘅社區，我見到自信，就算十五六歲都會走埋嚟同我分享。原本我都會諗，我可以幫到佢哋啲咩呢？到咗第三日，我見到希望。以前我可能好快落判斷，覺得幫唔到手，依家我覺得要花時間了解清楚，原來真係可以幫到佢哋！」
她直言單憑相片、片段甚至自己分享經歷，對大眾來說可能感受不深，但Michelle相信上天給予今次探訪機會必有原因，故回港後即時再助養兩名兒童，連同已經助養的3名兒童，Michelle準備榮升「5孩之母」！
作為父親的劉偉恒，行程中遇見其中一位爸爸感受很深，他說：「初初覺得佢冇乜笑容，後來同佢影相、傾偈，見到佢開始笑。呢個爸爸曾經有啲唔好嘅習慣，因為宣明會嘅『喜樂家庭』課程，令佢改變咗好多，做番個爸爸。」
