發哥跑到80歲 冀2粒鐘衝線
參加半馬 被封最受歡迎跑手
熱愛跑步的周潤發昨日參加「渣打馬拉松2025」半馬賽事，當他跑到終點時即引來全場起哄，廣播更稱他為「全場最受歡迎跑手」。他受訪時表示希望下次比賽可在2小時內完成，並揚言若身體許可，會跑到80歲。
「渣打馬拉松2025」昨日舉行，不少藝人踴躍參加。影帝周潤發參加半馬賽事，賽後發哥受訪稱因為天氣涼快，故狀態很弗。問到有否造到個人最好成績？他坦言沒有，今次以2小時24分鐘完成賽事，故定下目標，下次要跑快2分鐘，慢慢進步。問到明年可會考慮跑全馬？他說：「未必會，因為想盡量2小時內達標，如果跑到80歲都可以保持到2小時內就太好。（有冇俾其他跑手集郵而影響速度？）佢哋影完就走，完全冇阻到。」並笑言跑完後要食碗仔翅。
問到可想到其他國家跑馬拉松？他表示：「如果時間許可就可以，但都係比較鍾意喺香港跑，因為跑完有點心食。」再問發嫂可會陪他一齊跑？他笑言太太負責拉筋，亦可做啦啦隊，但不會跑：「佢話如果我出年有好成績，佢可以喺終點站畀利是我。」
他透露年初一到廣州為電影《唐探1900》謝票，預告今日會出席該片在港舉行的首映禮。提到唐詩詠有份跑，他反問記者：「佢成績係咪好好？」還指下次會拉她跑半馬，不過建議對方要儲氣力。問到跑友之中誰最大進步？他稱是盧海鵬、劉江和鮑起靜：「佢哋年紀咁大，每日都堅持跑5K好犀利，我都要向佢哋學習。」
唐詩詠起跑跌傷膝
唐詩詠以1小時10分完成10公里賽事，她透露成績比往年好，因事前有練跑，並指獲周潤發寄語：「佢話好好享受比賽，保持低心率，跑得太快就會好氣喘，呢句說話幫我打咗個好好嘅根基。」並自爆起步時受傷：「今朝起跑時被地下嘅暖包跣倒，成個人跪喺地，雖然膝頭隱隱作痛，但未有時間檢查傷口，決定跑完再算。」提到鄭嘉穎缺席「鐵馬家族」團拜，她表示知道嘉穎家中有事，故不敢問缺席原因，希望不是不開心的事，強調大家沒有不和。
至於林子善以1小時14分完成10公里賽，他表示滿意成績，本身着重享受過程，不會太計較時間。身為「鐵馬家族」成員的他表示每年都會向嘉穎拜年，明白對方有小朋友，有時很難抽身出席聚會。
