皇馬爆內訌 難贏馬體會
今個周末，睇英國波只有英足盃孭飛，戲碼只算一般，如果想睇好波，反而西甲更加吸引，皆因明晚深夜將上演榜首大戰兼馬德里打吡，由皇家馬德里主場迎戰馬德里體育會，兩軍周中都剛在西盃贏波，但「銀河艦隊」贏得險之餘，更爆出內訌，名將莫迪歷鬧爆世足先生雲尼斯奧斯，士氣受損，今場主場讓平/半都玩唔過呀！（NOW 632台周日4:00am直播）
西甲目前形勢是由皇馬以22戰49分帶出，馬體會少1分排次席，巴塞隆拿45分排第三，今場馬德里打吡勝負影響甚大，雙方都會搏到盡。皇馬昨晨在西盃作客以3:2險勝雷加利斯，表現令人失望，比賽途中更有莫迪歷鬧爆只顧向球證投訴而拒絕回防的雲尼斯奧斯，氣氛甚差，難免影響士氣。再者，「銀河艦隊」上輪西甲又以0:1不敵愛斯賓奴，狀態只算一般，今場要贏波絕不容易。
馬體會剛戰西盃以5:0大炒基達菲，主帥施蒙尼細仔古利安奴更梅開二度搶盡風頭。馬體會各項賽事近期5戰4勝，近4次聯賽交手更錄得1勝3和優勢，今場夠決心至少可保不敗。
