炎明熹現身撐「黑爸」賀歲片 姜皓文讚有心 冀港片百花齊放
香港文匯報訊（記者 梁靜儀）姜皓文（黑哥）與太太殷寧聯合監製的賀歲片《哈哈哈新年喜戲》，前晚於觀塘舉行首映禮，曾在電視劇《青春本我》中飾演姜皓文女兒、近日疑因合約問題傳出被TVB雪藏的炎明熹（Gigi），亦有到戲院撐「黑爸」場。
一身紅噹噹打扮的Gigi，前晚未有出席首映儀式及接受訪問，直接到戲院打卡及與「黑爸」合照。Gigi事後表示可以出席首映非常開心，場面亦十分熱鬧，又跟大家拜年：「希望大家身體健康，新年快樂，祝黑爸票房大賣。同埋今次是我第一次睇賀歲片，希望一陣入到去好好地享受。」問到是否「黑爸」開聲便立即到場支持？炎明熹︰「無錯，呢個係必須嘅！」其間不少觀眾上前跟Gigi合照。
當晚身兼監製與男主角的姜皓文，與一眾演員李璨琛（Sam）、陳靜（DaDa）、林盛斌（Bob）等出席外，不少圈中好友吳家樂、袁偉豪、戴耀明及曹敏寶夫婦等亦有出席支持。台上一眾演員在跟觀眾玩放飛機遊戲，Bob更誇口指觀眾放出的紙飛機若能超越其紙飛機，就給對方一千元，結果輸掉即改口說是1,000日圓。
殷寧與老公姜皓文二人一身紅衫現身，她大爆老公為了首映禮緊張到睡不着：「身上啲衫係老公設計，不過嚟到現場後佢就覺得我哋件衫似戲院制服。」姜皓文笑言他們是支持戲院，所以着戲院制服，希望有更多人入戲院睇戲。談到對票房可有期待？姜皓文笑言沒有期待也沒有擔心，因為觀眾各有口味，加上今年好多賀歲片上映，覺得有選擇是好事，百花齊放好開心。
姜皓文身兼兩職不計片酬
姜皓文自爆連片酬都還未收到：「但冇所謂，自己又想做唔同崗位。」問他是否收兩份人工時，姜皓文笑言自己都想，收一封利是就算，他認為最重要的是成品好睇，觀眾睇到他們的誠意。談到票房收幾多會派福利？姜皓文坦言票房收得，首先要分紅給工作人員，自己遲些再諗。問到可會着泳褲派福利？姜皓文笑說：「你哋夠膽睇，我就夠膽着。」
姜皓文表示：「一早約咗Gigi，佢好有心，仲叫我需要幫手就同佢講，而原本打算出席嘅陳煒，因為要開工嚟唔到。」殷寧多謝各方好友支持該片，才可行到這一步，又指拍攝經歷可以拍多部電影，其間她突然感觸落淚，又指跟老公互相心疼，姜皓文亦被感動至齊齊落淚。問到可有關心Gigi的前途？姜皓文說：「關心唔到太多，作為朋友只可傾吓偈，冇畀佢建議，因為唔知自己畀嘅意見有冇用。」。
Bob叮囑女兒男友要有責任感
阿Bob日前在社交平台自爆16歲大女霏霏首次帶男友回家，Bob笑言自己沒有呷醋，還大讚女兒男友好乖又高大靚仔。在旁的李璨琛就搞笑問Bob，若然他女兒男友的樣，似足他出道時的樣貌會怎樣？Bob搞笑地說：「可能冇心情出席活動。」
問到阿Bob可有跟女兒男友約法三章？他說：「我同個男仔講，要乖乖哋，開心最緊要，長遠唔講喇，唔好做啲古靈精怪嘢，最緊要有責任感。」他笑言沒有兇惡對女兒男友，只是會嚴肅對話。身為兩女之父的李璨琛，問到可會擔心女兒早拍拖？他笑說：「無得驚，女大女世界，我當年十四五歲就帶女友返屋企見父母，當時好單純，食吓飯拍吓拖。」
陳靜盼遇真命天子
單身的DaDa被問到可想生小孩，Bob即搶着表示可介紹男生給對方，還問DaDa有什麼要求。DaDa表示自己屬蛇，今年犯太歲，又會有正桃花出現，她說：「最緊要有男子氣概、善良同單身，事業、身高、體重都無所謂，好期待佢出現。」談到可會介意相睇？DaDa表示未試過，但都想嘗試，因為結婚後不能相睇。
