周嘉洛遊日食物中毒 搭飛機谷住返港
周嘉洛、陳瀅、朱敏瀚、麥美恩與車婉婉等昨日到觀塘宣傳新劇《痞子無間道》，缺席的王灝兒（JW）被安排以紙板人代為亮相。提到早前陳瀅、周嘉洛及朱敏瀚相約到日本旅行時食物中毒，陳瀅說：「我哋之前去咗日本4日3夜，八成玩、兩成做嘢，行程主要係我安排，唯獨有一樣嘢脫離我嘅行程，就係朱敏瀚話要食生蠔，點知就出事，食完之後食物中毒，好攰、冇力，發燒又嘔，但佢就冇事，只係叫我保重。其實出發前都有提醒大家要帶口罩同藥物，但點知係食生蠔出事。」
周嘉洛亦說：「我都有事，臨上機前唔舒服，成程機好辛苦，谷住谷住，屙唔番出嚟！有少少發燒同想嘔，但又嘔唔出。返嚟香港之後都谷住，過咗兩日就暢通番。（敢唔敢再食生蠔？）當然敢，都會再食，等個胃適應吓。」
