無名小子成英雄 打坐寸爆夏蘭特
英超勁旅阿仙奴與曼城近年交鋒例必精彩,更是次次擦出火花。今季兩軍首回合交手打和2:2,曼城射手夏蘭特寸爆「兵工廠」小將李維士史基利「你係乜水?」更向阿仙奴領隊阿迪達叫對方「保持謙遜」;到昨晚次循環再遇,阿仙奴主場狂數曼城5:1,贏波功臣李維士史基利擺出「魔人」招牌打坐慶祝姿勢,用行動大反擊。
經過半季磨練,之前名不見經傳的李維士史基利,已經名氣大增成為「兵工廠」主力,更在今戰攻入3:1領先一球,將優勢拉開。事實上,李維士史基利今場在攻守發揮均出色,全場更貢獻2次解圍、2次搶斷,7次地面對抗贏6次,1次爭頂成功同3次博得犯規,賽後更獲選阿仙奴隊內最佳球員。
已經成為球評的阿仙奴名宿亨利,賽後亦大讚李維士史基利:「我真係鍾意佢,尤其佢係阿仙奴自己人。佢非常有自信,我鍾意佢個入波,更鍾意佢個慶祝動作。個慶祝有乜問題?人人都可以模仿!」至於夏蘭特老父賽後則在社媒為子還擊:「呢隊波(阿仙奴)贏盡所有咩......冇喎!」