馮允謙靠師妹教新年習俗

香港文匯報訊(記者 子棠)恭喜發財!馮允謙(Jay)率領兩位同門師妹黃淑蔓(Feanna)和雲浩影(Cloud)向大家拜年,祝各位財源滾滾!身體健康!Jay在外國長大,對農曆新年傳統習俗一知半解,連「碌柚葉」都未聽聞,獲Feanna和Cloud為他惡補;Feanna期待吃媽媽包的開心果餃子;Cloud則自爆家中會訂兩份盆菜,吃到過年。
Jay捧着「財神」向大家拜年說:「祝大家新一年賺多啲,我希望自己事業再上層樓,寫多啲好歌、唱多啲好歌畀大家聽。」Cloud拿着揮春道:「我手上『大吉大利』揮春,寓意我開『大』啲嘅騷,然後出『大』碟,賺『大』錢唱『大』歌,盆滿缽滿,所有嘢都『大』!」像醒獅一樣調皮可愛的Feanna笑謂:「祝大家好似醒獅一樣龍馬精神、畫『蛇』添福。我係蛇女,今年犯太歲,大家都記得要去攝太歲!而蛇年心願就希望可以做晒Jay和Cloud嘅願望!」
每個家庭都各有農曆新年小習俗,Feanna分享說:「我每年都會同爸爸媽媽一齊倒數迎接年初一,而媽咪仲會包餃子,喺其中一粒餃子入面放開心果,邊個食到就嗰年會好幸運。另一個習俗就係初一唔准洗頭,好辛苦呀!」Cloud說:「我屋企唔准沖涼,話會洗走運氣。同埋新年唔可以掃地,要掃都要由大門口掃入屋,咁就唔會掃走啲好運。」Jay哈哈大笑說:「放心,我好少掃地,所以屋企好污糟。我仲知道新年唔可以剪頭髮。」那麼Jay知否「碌柚葉」用途?Jay表示不知道,Feanna即為他惡補:「年廿八要連埋『碌柚葉』一齊沖涼,可以洗走衰運。」
Cloud又表示屋企新年一定食盆菜,還會訂兩大個由年廿九食到年初二,其間不停加入食物變成火鍋,並稱最愛吃瑤柱。Feanna說:「我鍾意食髮菜,因為我鍾意發財,我哋鍾意『食字』。如果要加入食物,我自己就想加羊腩,因為我覺得盆菜同羊腩煲都幾襯。」Jay笑瞇瞇說:「我最鍾意食蝦,因為我鍾意笑哈哈。」