「籃神」轉「跑」道 許家傑悟人生
「送水輝」許家傑自小熱愛打籃球,更是圈中數一數二的籃球高手。不過近期他迷上跑步,由2024年至今已參加了5個大型馬拉松賽事。他接受《香港仔》專訪時表示跑步與打籃球最大分別是「個體」與「群體」,無論獨自跑步或相約好友輕鬆跑,都是一件非常放鬆、寫意的運動。
文:民章
許家傑擁有超強運動細胞,無論打籃球或跳拉丁舞都非常出色,入行後更與多位藝人好友組籃球隊Hero。不過近年他愛上跑步,他說:「不嬲我都鍾意做運動,但以前跑步主要係操腹肌,嗰時覺得跑步好辛苦,唔享受過程。直至兩年前好朋友陳安立叫我一齊報名參加跑步比賽,一報就係半馬21公里。一開始好驚自己完成唔到,通常我都係跑大約10公里,但係因為咁訂立咗一個目標。我記得嗰時大概係10月,但比賽喺1月,得3個月練習,當時諗既然報咗名就頂硬上。就喺呢段時間越跑越鍾意!」
唔會有輸贏感覺
完成第一次比賽後,許家傑發覺自己越來越愛跑步,故去年年初他報讀跑步教練課程,由去年至今年初,他參加了5個馬拉松賽事。他說:「跑步最好玩係同其他運動有少少唔同,譬如打籃球要同人鬥,要分出勝負,但跑步永遠都係同自己鬥。例如尋日60分鐘先跑完,今日就58分鐘跑完,都係一種進步。就算一班人一齊跑,都唔會分輸贏,唔會話我跑得快過你就係我贏,唔會有呢種感覺。反而大家會一齊研究點樣跑,一齊進步。有一種跑法叫輕鬆跑(easy run),冇壓力,大家可以傾住跑,朝早一齊跑去睇日出,黃昏就睇日落,嗰種感覺好舒服。」
許家傑指打籃球是激烈運動,一上場便專心比賽,什麼也不想,但跑步可以一個人慢慢思考人生:「好多人生道理都係喺一個人跑步嗰時諗出嚟,例如點解呢一刻咁辛苦?原來係之前唔夠努力,呢啲都係跑跑吓突然之間『叮』一聲出嚟,我覺得跑步都係一種靜思嘅行為。」
感染哥哥一齊跑
問到跑步過程中有什麼難忘事?他坦言最開心是感染了哥哥愛上跑步:「其中一個最難忘係同哥哥一齊跑,佢本身都鍾意做運動,但唔鍾意跑步。佢住馬鞍山,附近有個海旁好好跑,有時會約佢食完飯輕鬆跑10公里。開頭佢跑兩三公里就嗌救命,跑咗幾次佢已經跑到10公里,佢仲話自己健康咗。好多球類運動都需要突然間爆發,例如一啲轉身動作,如果自己唔夠休息,就好容易受傷。相對嚟講,跑步屬於中低強度嘅運動,當我自己好攰時跑半個鐘輕鬆跑,個感覺係好relax、好治癒。