組籃球隊HERO 熱衷公益
雖然許家傑近年愛上跑步,但絕不會「貪新忘舊」放棄籃球,若可以約「齊腳」必定開波。他表示當初入無綫,遇到一班同樣熱愛打籃球的台前幕後,故組成了HERO籃球隊:「我哋有報名參加比賽,首先係TVB盃,之前仲有報乙組嘅比賽,要好多時間練波,但因為大家都好鍾意打波,會盡量就。除非要開工,否則約咗人食飯呢啲都要放棄。」提到HERO不時做義工,許家傑說:「其實我唔係次次出席,不過我好鍾意做,無論我個人或以HERO名義都盡量出席,所以好多時見到我。除咗工作之外,我都係將慈善同HERO擺喺第二位,所以就算約咗人食飯或有其他嘢做,我都一定抽時間去。」
他續稱:「大嘅慈善機構例如保良局、獅子會都合作過,亦都試過自己搞全港籃球3人比賽,喺沙田河畔舉行。如果有收益捐畀人當然好啦,但有時反而係集合一啲商家朋友、安老院或特殊學校去捐物資都好有意義。而且未必係金錢上,甚至乎我哋去同大家見個面、講聲加油,都係一種公益。」