靚湯親熱戲 馬明冇眼睇
否認懷孕 歡迎邀拍劇
湯洛雯（靚湯）、黃庭鋒、傅嘉莉與張寶兒等昨日出席無綫賀歲劇《富貴千團》宣傳活動，靚湯透露於劇中有不少親熱戲，當中有一場與黃子恆的激咀戲，當時未是老公的馬國明竟然迴避不肯觀看，好明顯呷醋！
湯洛雯與黃庭鋒表示《富貴千團》於2021年拍攝，雖然相隔多時，但由於劇情瘋狂，故記憶猶新，靚湯說：「入面有SM同學生妹之夜。（你扮學生妹？）唔係我，我趕客咩！其他演員着得好大膽同性感，好專業。」提到庭鋒在劇中不乏除衫騷肌鏡頭，他笑言：「我要着SM嘅衫露兩點，靚湯仲問播唔播得出街。」
靚湯透露最大膽的場口是主動勾引黃子恆及接吻，該劇之前在收費台播出，當時仍是男友的馬國明刻意不看該場口：「佢唔想睇，話冇乜必要睇。其實我拍嗰陣好大壓力，因為講我主動去勾引黃子恆，呢方面我冇乜經驗。（搵馬國明試戲？）我現實中被動啲，所以拍攝時有啲尷尬。好彩子恆好有紳士風度，拍攝時感覺舒服。（馬國明知唔知再播？）佢知，到時我會叫佢入廚房煮湯圓。」
靚湯否認該劇是「封咀」之作：「我唔介意拍，但個程度唔好太誇張，佢（馬國明）都有拍啦。如果劇情需要我冇所謂，不過好誇張嘅話都要問吓佢，要尊重對方。」她強調沒說過婚後不拍劇：「我係好想拍劇，歡迎大家搵我。可能啲人以為我有咗，所以唔搵我拍，我係冇懷孕。」問到會否趁蛇年努力造人？她乘機投訴老公：「佢仲忙過我，度蜜月都未呀，我要等佢個期。」
張寶兒險被詐騙
張寶兒與傅嘉莉於活動上用毛筆寫揮春，寶兒被讚字靚可以在黃大仙開檔。傅嘉莉透露於劇中飾演詐騙集團成員，但現實中險被騙：「有次收到個電話，佢講得出我全名，佢話我喺社交網發表咗啲敏感言論，要約我出嚟見面。我當時係信，但因為太忙，約咗兩次都約唔成，後來先發現有問題。」張寶兒亦自爆前幾日遇上詐騙：「我收到一個冒充國際大品牌嘅電郵，話想同我合作。個電郵好專業，我有將自己啲資料畀佢，後來佢話寄啲嘢畀我放社交網，但擔心寄咗畀我後，我唔放上網，所以要我承擔部分運費，去到呢度我就覺得有啲問題。於是我向品牌求證，發現原來之前收到嘅電郵係詐騙。」
