【豐力深作】膨才健康快車單棍

黃子豐
今次十一場賽事,左睇右睇,都搵唔到邊場可以認真賭錢嘅,係第十場睇落叫做單純啲,有得諗下。「膨才」初出賺晒快步速贏馬,根本一啲都唔叻,嚴格嚟講,你可以話佢係贏咗一齊賺快步速,一齊衝上嚟跑嘅「黑白」,但「黑白」跑完嗰場第三後,再出兩場影都冇。所以話呢隻「膨才」初出贏馬嗰場,其實一啲都唔特別。本來再出應該係一隻三四倍馬,點知臨場啲飛勁到爆下順利再贏,睇嚟有啲聰明人,真係知呢隻唔係一般四班馬,今次上班負輕磅,隨時仲有。最強對手我睇係阿蔡隻「健康快車」,呢隻馬今季跑完個第二,初次上咗三班跑,初上三班嘅佢,跑咗個第三算中規中矩,但又未證明太多。其後再跑一場三班1200買到熱門跑到冇影跑第七。本來呢隻馬嘅賽績就冇乜特別,呢場大敗後,理應啲飛應該走晒,但結果唔係咁,大熱倒灶嘅佢,隔咗兩星期再跑,居然立即又有重飛跑得好,就連上次,其實飛數亦勁,表現亦算持續穩定,睇嚟有人確信隻馬今季係進步咗,三班必夠先會追住長賭,今埸我睇佢會係「膨才」最大對手,買番條單Q算數。