【地表最強】今晚投注美麗雙雄
兆 文
第四場第四班1600米。「一起美麗」上季三歲初出已跑1400，首兩戰稍追不過不失，第三仗改配潘頓即上名。今季操足上陣，首戰配布文排大外檔劣勢追近，接戰初跑1600用潘頓補中，無疑快步速有利，且走內欄好運有位，但三兩吓箭步彈甩對手。上仗孭重磅排14檔，更弊步速唔快，未有輸遠已合格。睇番賽程，剛周日及初三都有田草1600可跑，無啦啦變陣改攻谷草，仲要「一起美麗」係後上馬，蔡約翰一定諗過度過，再看備戰充足，1月24日試多課，周日試跑拍跳，仲要以上兩課拖住順走淡淡定，對比過往再多添一份成熟感。
第八場第三班1200米。「美麗緣分」台型極佳，一早已昅實，不過昔日脾氣唔多好，陣上一錯再錯。好彩羅富全冇放棄，悉心訓練之餘，更重要搵到艾兆禮接手，今季演出脫胎換骨，除了季初首戰跟前，之後改用後上跑法次次出色。
大前仗贏馬係經典一幕，殺退之後兩捷兼征服三班的「勇霸龍」，更誇張係「美麗緣分」末段一路瘦痾便便一路衝。近兩戰表現持續見好，前仗孭重磅大勝，上仗則僅不敵「晨曦儷人」，後駒跑出今季同程最快時間，並且上周再出僅負跑第二。「美麗緣分」今次抖一個月再戰，早前試閘表現既好，周一慢跳亦專注冇分心，大熟大勇惡馬更出戰弱組，再贏可期。
