【豐力深作】連連幸運唔係靠運
黃子豐
三班谷草1000，基本上每年都有一批路程專家喺度搵食，以前「非凡」、「勝不驕」、其後到「四季醒」上季就有「財才」、「年少多好」，其實每季跑嚟跑去，都係嗰批路程專家喺度搵食，而呢啲路程專家，又極少極少見佢哋可以轉去其他路程有表現。你可以話佢水準低，又可以話佢就係1000好，冇必要去其他路程打硬仗，總之就係呢個班次路程好嘅馬，一般都會留番喺度搏，轉跑其他三班路程，其實多數都唔得。好似今季喺三班谷1000跑得好嘅「巴薩諾瓦」、「紅逸舍」、「年少多好」、「馬力」、「雅典武士」呢批馬，你有冇見佢哋去其他路程跑得好？反正我就冇。所以，一連三場喺三班谷草1000打疊上名嘅「連連幸運」，本來輪下輪下，始終會喺三班谷1000贏到馬嘅。上場改跑三班谷1200，換咗一批完全唔同嘅對手，碰到「椒椒醒」、「家樂龍駒」、「競駿非凡」、「有財有勢」呢批1200馬，賽前我係唔睇好嘅。但佢臨場嘅飛，居然好勁，最後5.4倍熱過曬之前跑有表現嘅1000米嗰陣，事後證明，人哋係聰明嘅，隻馬跑1200真係仲叻，繼續跑1200，馬膽可以信佢。
