蕭正楠幫BB改名 擬叫「蕭雞翼」

  翠如體重急升 唔敢上磅

  懷孕超過5個月的黃翠如昨日與老公蕭正楠一齊出席活動,夫妻檔搵真銀!翠如笑言最近經常與老公商量BB的名字,踢爆老公竟然想將BB改名做蕭叉燒、蕭雞翼同蕭賣等,非常搞笑!

  蕭正楠與太太黃翠如昨日到大埔出席賀年活動,當兩人寫許願卡,翠如寫上「生B順利」,蕭正楠則寫「出入平安」。蕭正楠表示每晚都會幫太太吹頭,問到是否已幫BB改名?翠如笑言:「老公偏向食物方面改名,例如蕭叉燒、蕭雞翼同蕭賣等;我就諗過叫蕭吉祥、蕭喜慶、蕭健康。」

  翠如透露BB郁得很誇張,晚上猶如開派對般在肚內轉:「以前冇概念,依家對住個肚成日捕捉佢郁嘅畫面,好唔容易,不過影到。其他人睇可能會覺得恐怖,不過我睇就開心。」她爆老公經常跟BB傾偈,更會播他的歌給BB聽:「人哋胎教聽蕭邦,我都唔明點解。」蕭正楠解釋:「呢首歌係我寫畀爸爸嘅,好有意義,所以都想將呢首歌畀BB聽。」他又稱暫時放棄了足球:「因為太太依家唔出街,所以我最近都冇踢波陪太太,不過我都係自己停,因為一踢波我就好投入,佢唔想我受傷,因為我受傷過無數次!」

  醫生建議開刀生B

  翠如表示懷孕後增磅不少,現時都不敢磅重:「試過食完一餐重咗一公斤,依家平均每星期最少都重1.5公斤。」她指BB似自己與老公小時候一樣頭大,故醫生建議開刀:「雖然擇咗日子,但都要睇BB Size再決定時間。」問到生完會否立即追多個?她說:「我唔貪心,有呢個禮物已經感恩同滿足。我佗B會上癮,見佢喺我肚度郁好開心。」她又自爆早前首次做孕婦按摩:「可能我趴低嗰陣BB反轉咗,所以反應好大,最後我都係打側瞓。」蕭正楠稱翠如為了BB犧牲很多,因她以前是「骨精」,現在不能經常按摩。

  提到兩人在《萬千星輝頒獎禮2024》「最佳男、女配角」大熱倒灶,不少內地和香港的網民都瘋狂「洗版」指賽果不公平,蕭正楠說:「我係合約藝人,唔會唔開心。(失望?)冇負面情緒亦都唔失望,因為去到後台好多同事都話投咗我票,得到好多關愛,有同事仲攬住我喊,好多謝大家,有你哋嘅愛已經好好。」翠如亦稱:「同事之間嘅愛錫係好重要。」蕭正楠承諾日後會繼續努力:「當晚最驚係餓親BB,因為好忙,冇時間食嘢。」