【豐力深作】熾烈神駒無得保留
黃子豐
四班沙田1200，有時會出現一啲好叻嘅質新馬，好似「膨才」、「喵喵怪」咁，但大部份時候，其實四班水準，其實都唔見得好高。因為啲質新馬跑兩三場後，基本上係龍係蟲都見得七七八八，你係冇速度，遲熟未得就係未得，所以有時有啲有能力嘅馬，好似「騰龍四海」等只要證明過有一定能力後，如果抽到弱組，其實好多時都敢重飛搏殺。
今期四班1200拆兩組，睇嚟睇去，第一組會比較弱，三隻初出馬中，係得隻「神舟彎月」似樣啲。大部份對手，其實都跑過好多，見得八八九九，沈集成呢隻「熾烈神駒」未出賽早早試閘已經流咗鼻血。上季初期出賽安排跑兩場，一場百幾倍，一場四十幾倍，馬房好明顯知道隻馬未得。隔咗個暑假，其實隻馬今季初出跑1400突然有飛，結果跑到包尾後，飛數居然冇點走。其後沈集成安排隻馬縮番落1200後，其實跑四場，有三場跑得好，睇嚟隻馬今季確係成熟咗，季初有飛係有原因嘅，而家繼續跑1200，流鼻血馬應該唔會點玩嘢。加上未交代，麥道朗返嚟肯再跑，馬膽我信呢隻。
