獲許濤探班 袁詠儀顯地位

  相隔16年回巢無綫拍劇

  港姐出身的袁詠儀(靚靚),近日重返娘家無綫拍攝新劇《模仿人生》。日前她與劇中拍檔羅子溢、陳自瑤等於深圳開工,更獲無綫行政主席許濤親自前往探班,果然畀足面。靚靚更對許濤說:「你要多啲支持我哋依套劇喎!」足見這位兩屆金像影后地位超然。

  前年佘詩曼回歸無綫拍攝《新聞女王》,播出後掀起熱潮,今次則輪到靚靚歸隊,同樣拍攝由《新》劇的鍾澍佳任總監製的《模仿人生》。無綫TVB娛樂新聞台日前北上深圳採訪靚靚,更拍下老闆許濤親自探班一幕。許濤對這位影后稱:「你好耐無拍劇喇喎,多謝你返嚟。」她即對許濤說:「係呀,你要多啲支持我哋依套劇喎!」許濤回應:「所以我咪嚟囉!」

  讚《婚後事》題材貼地

  今次是靚靚繼2009年拍畢《富貴門》後「愛回家」,原來她今次堅決強勢回歸只因一個人。她受訪問時稱:「鍾澍佳囉!我幾鍾意佢近排嘅作品,我都睇過一啲,佢都好好,之前亦都有問過我拍另一啲,但我話我想拍另一啲時,佢真係有啲幾得意嘅,我就考慮啦。」靚靚不諱言近年也有留意TVB劇集:「其實我幾鍾意《婚後事》,覺得好貼地好鍾意。」談到《模仿人生》有《婚》劇主角陳自瑤、羅子溢助陣,靚靚直言:「係呀!我哋做咗好大爭取㗎!(一定要佢哋喺度?)係呀!合約有寫㗎!依啲要求無乜人做,通常係講開工時間,幾多錢,但係我唔係,我就係要依啲(陳自瑤、羅子溢)演員。 」

  羅子溢:好似第一次追女仔

  另一方面,靚靚又指今次出山獲老公張智霖(Chilam)支持,全因老公覺得要工作才會長壽:「佢覺得人一定要做嘢,唔做嘢嘅人好快死,成日覺得唔可以咁早退休,要揀自己鍾意做嘅嘢,喺屋企你眼望我眼,好快會鍊死對方。(Chilam北上探班?)老公好少探班,大家都拍戲嘅有乜好睇!(佢會好掛住你㗎?)總之唔死就得喇。」至於獲影后大讚的陳自瑤,她坦言期待與靚靚對戲,亦高興對方拍劇:「影后級,如果可以做對手戲學到好多嘢!」子溢則坦言多次與Chilam合作,今次與其妻拍劇大感新鮮:「第一次同靚靚姐咁重分量演員合作,戰戰兢兢好興奮,好似第一次追女仔咁!」