配角顯身價 梅利爭口氣
奧尼爾鬧醒 轟45分領金塊贏波
日前被NBA傳奇中鋒「巨無霸」奧尼爾指是金塊爭逐冠軍最後拼圖的謝馬爾梅利，昨晨終於打出身價波，在昨晨金塊作客獨行俠之戰狂轟45分，領軍以118:99大勝。身為球隊「二哥」的他，今季表現一直平平，但昨仗終於是配角變主角，讓兩位「三雙王」祖傑與韋斯布克齊齊退居二線，梅利賽後也說：「只要我喺狀態，根本冇嘢要擔心！」
奧尼爾日前在一個電視台節目與名將卡特及謝倫羅斯等討論到金塊，他說：「依家連韋斯布克都打到好掂，梅利先生你去咗邊？我唔知你係咪受傷，我唔討論太多呢點，但我保證只要你企番出嚟，打番出水準，你哋就係冠軍！」
金塊今季在梅利與艾朗哥頓輪流受傷，以至傷癒復出後又狀態不穩下，目前僅以24勝15負排在西岸第4，較西岸榜首的雷霆落後9場勝差。直到昨晨之戰，梅利首戰便着晒火9射7中取得19分，他主動要求主帥米高馬龍不要將他收起，結果他手感極佳，半場便拿下了32分；而最後全場上陣37分鐘，26投18中，包括三分球9射5中，拿下45分6籃板，而隊中兩大「三雙王」則難得可以打得輕鬆，祖傑與韋斯布克分別只得10分與9分，金塊卻仍能大勝。
對於奧尼爾的評論，梅利賽後回應：「我完全同意，當我喺狀態，根本冇嘢要擔心，我哋只要做好防守就得！奧尼爾講得啱，直到今仗之前，我都打得好差。」
主帥馬龍：教練隊友都撐你
對於愛將今季飽受批評，主帥米高馬龍表示：「我諗擺喺梅利身上嘅放大鏡真係睇得佢好緊，其實大家都要呼吸空間；我根本認為佢近期嘅數據一直都唔錯，好幫到我哋。所有人都想我哋打得完美，想我哋不敗，但唔會係咁，所有人都會有起跌，最緊要係梅利要知道，喺更衣室入面嘅教練同隊友都一直支持住佢。」有梅利回勇，金塊的爭標機會相信的確會大增。
