【豐力深作】「電訊驕陽」行舊路
黃子豐
「電訊」系一家人，其實買馬都有一套模式。呢系馬一直以來，都幾鍾意買啲喺外國證明咗能力，但又唔使太叻嘅自購馬，插入三班後，來到香港順其自然慢慢減下分。
其實我覺得呢個做法真係幾聰明，隻馬早在海外證明過識贏，有一定競賽能力，來到香港，進步自然好，就算唔進步，香港減分減得咁快，狂跑下，落到四班贏到自然好，贏唔到咪再等下落到五班先反彈囉。以往「電訊超班」、「電訊巨星」、「電訊超星」、「電訊犇豹」、「電訊大班」、「電訊飛車」邊隻唔係咁樣。今期隻「電訊驕陽」咪又係一樣，自購馬喺澳洲贏過兩場好普通嘅賽事，來到香港插三班梗係唔夠跑，上季出賽六次，長期87至213倍，完全冇飛。其實今季初頭兩場，都仲係65至137倍，擺到明就係未得，喺度減緊分。直到大前仗突然有飛後，開始有少少走勢，前仗居然飛數超勁，變咗12倍，即時飛到馬到。好明顯，有人知道呢隻馬個分已到咗咁上下，狀態亦已重新跑起了，而家四班谷草1200長期狂拆組，水準有時仲低過五班，我睇佢唔會等落班。
