戴耀明男一夢不死 冀與陳曉華談情
自知唔靚仔 靠小人物發圍
世上有萬千演員，但並非人人都可以做主角！現年52歲的無綫綠葉王戴耀明從影超過30年，入行初期多演蠱惑仔、變態佬等「下靶」角色，不過卻憑獨特的喜感深得網民喜愛。從小到大熱愛演戲的戴耀明接受《香港仔》獨家專訪，自認沒有「小生樣」，但仍希望當上男一，最想與心目中的女神陳曉華演情侶。
文：記者 民章
入行32年的戴耀明作品無數，雖然不是當主角，但不少角色都令觀眾難忘，包括《巾幗梟雄之義海豪情》的「向山達也」、《鐵馬尋橋》的「排長」、《青春不要臉》的「李天光」及《新四十二章》的「施朗」等。他表示很感激《青春不要臉》監製找他演藝員訓練班班主任：「從來冇人夠膽搵我做一個好正經、好有演藝修養嘅人，所以我覺得自己好破格，多謝監製夠膽用一個經常做黑社會嘅人去演老師。」他另一喜歡的角色是《新四十二章》的「施朗」，他說：「我第一次演武林高手，亦叫做同一個女仔鄺潔楹有一種患得患失嘅喜歡感覺，到最後死喺佢懷裏，嗰個感覺好淒美，亦係我喺無綫好少有呢啲機會演出。」
最想演「一拳超人」
戴耀明曾於內地網絡電影《爆裂老婆三歲夫》演男主角，但於無綫只當配角，他自認沒有一線小生的樣貌，但希望終有一日可以做無綫劇的男主角：「我知道自己個樣唔係黃宗澤、陳豪、馬國明嘅小生樣，所以我做主角都可能係一個小人物。我嘅終極夢想就係希望做日本動漫嘅『一拳超人』 ，因為佢就係一個社會上嘅小人物，但係當佢要保護人類時，佢就變成一個好強大嘅強者 ，佢平時嘅日常生活可能條薯條俾人食咗都會唔開心，呢個小人物嘅角色我覺得比較接近我。」
無綫不少綠葉出名好戲，戴耀明更獲網民愛戴，但他謙稱從不覺得自己演技好，很多時都靠觀察別人來提升演技：「我好怕自己做咗咁多年做到順滑咗，其實我好鍾意行路，喺鬧市我可以行兩三個鐘，因為街上面有好多唔同嘅路人都係一個角色，我覺得都可以作為我嘅圖書館。例如好多人覺得醫生就好似電視上面嘅生活，佢哋唔煙唔酒，但我現實生活識得有醫生朋友會落夜總會同又煙又酒，我覺得呢啲先係角色最真實嘅一面。同埋我會睇一啲新人演出，會令我學到嘢，因為新人冇包袱，亦都冇乜演技基礎，所以佢哋嘅演出可能係最自然、冇修飾技巧、冇所謂用演技去演出，正正呢啲就係我需要嘅嘢。依家啲觀眾好聰明，你係扮緊醫生定係你畀人感覺真係一個醫生，觀眾係睇得出。」
