神龍發威 魔性回歸
英足盃互射12碼踢走阿仙奴
前晚上演的英足盃第三圈「仙魔決」，由阿仙奴主場迎戰曼聯，賽前被睇低一線的「紅魔鬼」，今戰突然回勇大打爭氣波，尤其是來自土耳其的門將比恩迪亞，在比賽中屢救險球，然後是互射12碼階段救出夏維斯的主射，成為了晉級英雄。賽後，曼聯主帥艾摩廉指出今場贏波關鍵是球隊重拾魔性，展現高昂鬥志；相反，射失了12碼的「兵工廠」罪人夏維斯，則慘成「廠迷」公敵，其妻更被球迷網暴，認真陰功。
上月初兩軍在英足盃碰頭，阿仙奴當日在酋長球場主場輕勝2:0，比賽過程猶如大人蝦細路，曼聯根本無還擊之力。然而在相隔個半月後，「紅魔鬼」卻能展現足夠對抗能力，先在下半場7分鐘由般奴費南迪斯建功先開紀錄，即使9分鐘之後有達洛治犯規兩黃變一紅，隨即再被加比爾馬加希斯近射得手追和，但曼聯始終未有洩氣。
阿仙奴在下半場中段由夏維斯博得12碼，隊長馬田奧迪加特操刀卻被比恩迪亞捉路救出。雙方法定時間打和1:1，打多一人的阿仙奴在加時亦未能拿下勝利，最終互射12碼曼聯5射全中，阿仙奴則有夏維斯主射第2球被救出，4射3失，「紅魔鬼」12碼贏5:3晉級，下圈32強將會對由前助教名宿雲尼斯達萊帶領的李斯特城。
曼聯之前在聯賽盃出局，門將比恩迪亞被角球直接彎入，表現被批，今場卻將功贖罪，助球隊得勝。現年26歲的他，之前在費倫巴治効力，在前年夏天加盟，今次可算是吐氣揚眉，他賽後也不忘感謝球迷的支持；而主帥艾摩廉也大讚：「佢一直落力工作，人生總會有美好時光，佢依家做咗我哋英雄。」
夏維斯宴客 其妻被球迷詛咒
艾摩廉也解釋今次贏波與上次碰頭敗陣分別：「我哋展現咗唔同嘅態度，球員都願意為球隊犧牲。我哋一齊捱打，但展現出特質，呢樣係最重要。我亦感受到同球迷及職員嘅連結，今日真係好日子。」
至於主隊前鋒夏維斯，今場兩度錯失入波黃金機會，再在互射12碼宴客，成為了球迷針對對象，個別球迷更向夏維斯的懷孕妻子寫下惡毒留言。
