多得Anson Lo帶挈 阿姐蘿蔔糕大賣
欽點鍾柔美合唱
汪明荃(阿姐)、周柏豪、聲夢歌手鍾柔美(Yumi)、姚焯菲(Chantel)、張馳豪與林智樂等前晚為《慈善星輝仁濟夜》擔任表演嘉賓。阿姐透露早前邀盧瀚霆(Anson Lo)任個唱嘉賓,對方於台上大讚她的蘿蔔糕好味,結果今年她與拍檔推出自家蘿蔔糕,吸引「神徒」(Anson Lo粉絲暱稱)搶購!
阿姐透露分別與3位後輩Yumi、林奕匡與黃妍合唱,她更特意揀Yumi合唱《少女的祈禱》:「導演想我同年輕人合作,我之前搵過Yumi拍跳舞短片,所以促成今次合作。」Yumi坦言最初不敢撩阿姐傾偈:「我之前喺紅館睇佢開騷,佢好犀利,我要好好向佢學習。」Chantel則稱很想跟阿姐合唱,阿姐笑言非常樂意,當她聽到Yumi、Chantel很喜歡自己的《迷人Pink Lady》,即說不介意她們翻唱。
周柏豪「返工流血」?
提到阿姐最近為自家蘿蔔糕品牌拍廣告,吸引很多「神徒」購買,阿姐開心說:「Anson Lo之前喺我紅館演唱會話喺我屋企食咗好多蘿蔔糕,讚好好味,仲帶走一底蘿蔔糕返屋企畀媽咪食,可能因為咁令好多神徒訂購,真係益咗我,哈哈!」她又稱:「蘿蔔糕食譜係羅家英媽媽傳落嚟嘅,係家傳之寶。今年我交畀拍檔大量生產,所以我今年唔使落手做太多。」
周柏豪透露近年經常四圍飛工作,預計年廿九才收爐,農曆新年會留港度歲,跟親友拜年:「之前疫情關係,減少同親友見面,加上生咗兩個小朋友,好似甩開咗朋友圈,希望今年由社恐變『社牛』,打算帶小朋友拜年。除咗同公司同事食團年飯,都想約見『大灣仔哥哥』陳小春、張智霖、謝天華、梁漢文、林曉峰、吳卓羲,不過大家都忙,好難約!」他指女兒及兒子現時分別5歲及3歲,女兒很明白事理,知道他要工作,會睇電視看他演出,但兒子年紀尚小,不喜歡他工作:「佢見我返工就話『返工流血』,意思係返工呢樣嘢流血,因為佢覺得流血係最強嘅攻擊;我去打籃球,佢就會話『打波流血』。」