C朗帶傷踢 撐艾納斯輕勝
沙特聯休戰一個月後重開
休戰了約一個月的沙特聯，今晚重燃戰火，其中焦點戰有葡萄牙老球王C朗拿度壓陣的艾納斯，主場迎戰尾五弱旅艾科多。艾納斯休季前狀態一般，C朗又有輕傷在身，今場未必可以搏得太盡，但要贏艾科多仍是綽綽有餘，預計輕鬆贏夠兩球就會收手，今場一於冷敲「讓球主客和」[-2]和波，作為今日過關3串4推介重心。（NOW 671台周五1:00am直播）
沙特聯接戰完13輪後，在上月8日起開始休戰一個月，艾納斯在去年最後一戰以1:2不敵聯賽「一哥」伊蒂哈德，聯賽排名已經跌至第4，落後伊蒂哈德11分，要爭逐聯賽冠軍形勢下風，餘下球季已經不容再失。
首席球星C朗拿度與艾納斯尚餘半年合約，近期不斷有風吹出，指C朗得到幾間歐洲球會垂青，而C朗據報則仍未定去留，聲言留在沙特開心，但期望取得更佳成績。消息指，C朗正要求球會積極增兵買人加強實力，包括從前東家曼聯簽入卡斯米路等，足見他對球隊戰績仍有極高要求。
為保爭標機會，C朗雖然據報腹部有傷在身，但預計仍會如常披甲，球隊連同之前亞冠敗仗，在各項賽事錄得連敗，狀態一般，今場即使遇弱，恐怕亦不易大勝，尤其一旦拉開比數，C朗亦可能會提早收起，贏兩球應該啱啱好。對手艾科多目前位列尾五，上季則排尾四僅僅逃出生天避開降班，大軍整體實力有限，今場客戰會死守，應可逃過大敗。
過關串安德列治與格流
次關比盃八強比士佐特VA中立場對安德列治，前者在比甲位列包尾，實力與季席安德列治大有距離。兩軍近5次正式賽事交手，安德列治錄得4勝1負，有往績支持，客勝必捧。（開賽時間：周五3:30am）
至於尾關有蘇超補賽第8位登地主場對次席格拉斯哥流浪，登地近期主場錄得連敗，地頭出戰亦沒優勢，格流近績雖然一般，近3輪聯賽1勝2和，但共入8球火力全開，始終實力遠勝登地，今仗強攻有力大勝。（開賽時間：周五4:00am）
