【地表最強】智取神駒弗到爆炸
兆 文
第四場第四班1200米。未排位前，原本覺得今組是三組四班1200最強的一組，因為假假地新勝馬都有「美麗之光」同「囍眼光」兩匹，而另外兩組，即第二同第五場，24匹參戰馬竟然冇一匹在上仗取勝。亦因為「美麗之光」同「囍眼光」近況突出，預期可串Q，但排位後抽出檔位，一隻8檔，一隻12檔，情況變得不得妙。其實「囍眼光」跑法後上，外檔不太受影響，可是今場快馬太少了，仲要此駒好重口，早段必人馬角力。至為「美麗之光」排9檔也不太有利，堅持看好一來上勝姿態出色，二來周一朝回港出跳，唔急唔搶，表現內斂，質新馬持續進步，四班唔會留得住。
第七場第二班1800米一月盃。「越駿歡欣」是上屆此盃盟主，之後加至100以上持續神勇，包括在大賽輸近，不過今戰既要孭頂磅上陣，更弊12月17至12月22日缺課，存在極大隱憂。亦因為「越駿歡欣」上陣，今組馬除了「錶之五知」同「當年情」，每駒磅位都比上仗為輕，其中一匹是輕了10磅的「智取神駒」，這匹智利賽駒上仗如何出色，從紙上顯示的12 12 12 2走位反映一切，更誇張是早段遠遠墮後完全脫節，最後交出全場最快末段，確認呢席亞軍相當犀利。今次相隔一個有多再跑，期間試了兩課閘備戰積極，周一試跑草地出跳不只是沈廄搏殺絕招，且跳來墜手起勁，弗到不得了。
