【豐力深作】馬特峰唔停手
黃子豐
「馬特峰」前季新馬跑咗一場後，右前腿就出問題，搞咗一大段時間，又做咗個喉部手術，來矯正會厭覆蓋問題，頭搭尾差不多養咗成年，等到上季三月先可以再跑。之後蘇偉賢小心翼翼，每個月先夠膽畀佢跑一場。跑得咁少嘅原因，相信係因為知道隻馬進度實在未夠，隨便出多幾埸，隨時減分減得太快，等唔到今季就被迫退役。事實上，隻馬上季每跑一場两分三分咁減，如果出密點，真係今季未必有得留低。
再睇對上兩季長期過百倍嘅「馬特峰」，今季初出飛數已唔同曬，好明顯係早有人知隻馬今季成熟進步咗。而近三仗連場殺入前列嘅佢，睇嚟亦真係開始進入反彈期。馬主對上兩季養馬養咗咁耐，白白畀咗咁耐養馬費，遲熟中長途馬而家先剛剛開始成熟，評分又由低點開始反彈，再加上呢隻馬以前傷患咁多，咁耐唔跑得，傷勢唔方少嘢，難得而家養返好. 剛剛先贏返場，冇理由咁快縮返條槓，按正常部署，點都應該最少贏多一場，搵返多少對上兩季養馬費條數，蘇偉賢先交代到，五歲當打馬而家跑返贏馬路程，馬膽我信呢隻。
