雷霆得分王 準MVP巨星
領軍挫木狼 獲蟻俠大讚
NBA今季變天，傳統強豪表現失色，代之而起統領東西岸的分別是騎士與雷霆。雷霆昨晨在主場以113:105勇挫木狼，寫下了常規賽12連勝佳績，也是球隊進駐奧克拉荷馬後的隊史最長連勝紀錄。球隊首席球星「SGA」基治奧斯阿歷山大昨仗狂轟40分，成為今季聯盟首位千分射手，賽後就連對手「蟻俠」安東尼愛德華斯也甘拜下風，大讚「SGA」是今季MVP（最有價值球員）！
木狼昨仗半場領先6分，但雷霆第三節在「SAG」個人轟入19分下，打出單節43:23反超，最終更以8分差距取勝，賽後雷霆以27勝5負續居西岸首席，在全聯盟則僅排次席，勝差只落後於東岸騎士1.5場。扣除不計入常規賽的NBA盃決賽敗仗，雷霆近期在常規賽打出了12連勝走勢，狀態出色，氣勢強勁。
「SGA」在球隊的12連勝走勢中，錄得了平均33.4分及56.6%投射命中率，他也對自己表現相當滿意：「我感覺好流暢，比賽一切都嚟得自然，我唔需要壓迫自己，亦唔會諗太多，努力工作終於有回報。」「SGA」現時在聯盟得分榜以平均31.3分位列第二，平均2次偷波也是NBA次席，而球隊在其領導下，更是聯盟防守最佳。
「蟻俠」愛德華斯上季帶領木狼打入季後賽西岸決賽，當時出色表現贏得了「波神接班人」外號，然而隨着隊友唐斯今季初被交易至紐約人，木狼與「蟻俠」表現也大為失色，昨仗愛德華斯只得20分7籃板，賽後也向「SGA」大派高帽：「對我嚟講，根本係守佢（SGA）唔住，單對單就預咗要畀佢兩分，我認為一定要夾擊佢，就算冇效都要。」
愛德華斯補充：「我唔知聯盟係咪會再頒MVP畀祖傑，但畀我揀，係「SGA」，佢根本成個MVP咁，今晚真係勁到癲。佢每晚都表現穩定，球隊交晒個波畀佢去打，如果佢繼續保持到，我肯定佢會攞MVP。」
SGA：獲競爭對手認同最滿足
對於對手的稱讚，「SGA」回應：「我唔係要冒犯媒體人，但嚟自同場作賽、同齡嘅高水平對手讚賞同認可，先係最滿足。」雷霆明晨續於主場迎戰快艇，將會繼續向騎士的榜首位進逼。
