世界巡演走足一整年 Twins倫敦騷淚別歌迷
香港文匯報訊（記者 梁靜儀）Twins的「Twins Spirit」世界巡迴演唱會圓滿結束。這次演唱會由年頭開始，巡足一整年，聖誕於倫敦OVO Arena Wembley順利完成，JW（王灝兒）也有去捧場。當晚氣氛超熱鬧，Twins本想同美國場一樣繞場握手，但因歌迷太瘋狂熱情，只得在台前握手。之後她們再飛到新加坡演出兩場。這一站不單是Twins出道至今的第100及101場演唱會，亦是「Twins Spirit」這個騷的最終場。兩人於舞台上跟歌迷暫別，歌迷台下大哭，兩人也被感動得眼泛淚光。慶功時阿Sa跟一班舞者擁抱，又再忍不住落下眼淚。
阿Sa回想這一年來的努力，走過世界各地，又首次在倫敦開騷，非常開心。她表示從沒想到可以走足一整年 : 「每一站都有難以忘記的美好回憶， 其中應付『時差』對我來講最難忘。美加巡迴去完東岸又去西岸，連續21日，返香港一個禮拜又去倫敦， 喺倫敦過埋聖誕又直接去新加坡，覺得自己嘅體能都真係算係咁。」
英國之旅過後，阿Sa就留低放一個短假，與媽咪及容祖兒等好友一起過聖誕，她笑說：「英國之旅好開心呀，因為第一次同媽咪喺外國過聖誕 ，好多朋友都過埋嚟一齊玩，仲有我一啲移咗民去英國嘅舊同學，呢個咁難得嘅聖誕party，我哋都籌備咗一陣，大家齊心協力先可以達成，真係好難忘、好好玩。」
新加坡慶功會上，阿Sa坦言走到最後一站有點不捨：「每個演唱會都會有結束嘅時候，當然會唔捨得，喺個台上面見到有好多歌迷都喊，搞到我都忍唔住。 當你企喺個台上面，見到台下面嘅觀眾好投入咁跟住你唱歌，對住你好開心咁笑，好留心咁聽你講每一句說話，真係好感動。我會永遠都記得呢啲畫面。慶功時啲dancer唔捨得，一個二個喺度喊，所以又搞到我忍唔住，一開咗個掣就好難停㗎啦，哈哈！」
回港後，阿Sa表示即要為賀歲電影做宣傳，並期待謝票時跟一班演員一齊玩、一齊吹水。 經過超級忙碌的一年，阿Sa不諱言有點攰，計劃明年放慢腳步，所謂長命功夫長命做。
至於阿嬌（鍾欣潼）就表示巡足一整年非常難忘：「我同阿Sa都經常喺台上面講，我哋每一次演唱會，都會當係最後一次，今次都唔例外，無人知日後幾時再開。」她續說：「非常多謝歌迷這次巡演的一路相伴，佢哋做咗好多應援，有忠粉Twins才行到咁遠。第一次喺英國過聖誕，好有氣氛，都難忘，我買咗好多聖誕裝飾，返屋企裝飾自己個聖誕樹。」為養足精神，她已向公司申請放假。
