【地表最強】旺旺快駒見真章
兆 文
大家好，我是兆文。我可以話在馬圈長大，圈內人的馬房仔，我爺爺、爸爸過往是馬伕，甚至弟弟現時也在馬房工作，亦因為耳濡目染，至細已對賽馬有相當興趣。我投身評馬界已卅年了，16歲時已入行，多年來主力觀察馬匹晨課備戰，對馬匹狀態有一定了解，希望為讀者們帶來斬獲。
今期元旦賽事採用Ｃ欄，查對上一次跑相同賽道要數到11月24日，當日十場賽事，排一檔賽駒合共取得三冠兩亞兩季；至於跑法方面，前置馬可謂控制大局，中距離賽事若然在步速偏快嘅幫助下，後追馬仍有得冚吓。
出爭第三場四班1200米嘅「旺旺快駒」來自廖康銘馬房，上季初出跑田草千二米便即可以上名，之後三仗爭千四米落敗或許氣量未練成，其後更受腳患纏身提早抖暑，今季久休復出跑田草千二米，居後列入直路，初段未盡望空下仍能收復大量失地跑第六名，省過一仗熱身後加埋檔位內移，有權見真章。
另今次尾場跑三班1600米，由於預計會多駒搶放，步速或會偏快，所以蔡約翰馬房今季打吡寄語厚望嘅「米奇」可以賺到步速形勢之利。該駒上賽初跑千六米，旋即後上掄元，馬兒表現亮麗，由於今場適逢為突五分賽事，所以馬兒仍可喺三班作賽，仲要唔使負頂磅，相信可再下一城。
