楊受成發夢笑醒 獲許冠文讚有眼光
有信心《破·地獄》創香港票房紀錄
電影《破·地獄》昨日舉行海報劇照展傳媒體驗日，導演陳茂賢、演員許冠文（米高）、衛詩雅、艾妮、劉若寶出席，英皇集團主席楊受成亦有到場支持，道賀電影上畫10天票房衝破6千萬。米高坦言心情很鼓舞，希望延續港產片氣勢，楊受成則稱開心到發夢都會笑出聲，有信心破香港電影票房紀錄。
本月24日是衛詩雅40歲生日，大會送上蛋糕為她慶祝，她吹蠟燭時笑言是最後一次三字頭和「衛小姐」的生日。許冠文開心電影有好票房及好口碑：「我第一日都話呢部戲係喜劇，觀眾睇完喊完後感覺世界變靚咗，都釋放咗自己。可能票房好我先咁講，但真係要恭喜老闆有獨到眼光，因為真係唔容易去投資。」他透露拍攝期間，有幾場戲忘了衛詩雅是演員，當作自己的女兒看待，讚對方演得很好，並希望《破》片繼續破紀錄：「香港電影環境依家仲係相當困難，希望可以帶動未來港產片更高票房紀錄。」
楊受成自認是生意人，沒有偉大思想：「可以搵到黃子華同米高拍檔真係好夢幻！朋友同我講『受哥你係咪好多錢去拍棺材舖戲？搵兩個笑匠拍部咁嚴肅嘅戲係咪嫌錢多？唔開笑片都神經嘅』，當時我心慌慌哋，但已經應承要拍都死頂。」許冠文則直言近日心情興奮：「最近我出街，有人話幾十年同我一齊笑，依家一齊喊，從來都未曾試過。部戲真係有好大魔力。」
米高坦言看着香港電影市道差，其實香港整體也差，各界都要做好自己的行業：「所以我出番嚟做演員，支持好劇本同角色，希望延續港產片嘅氣勢。依家觀眾好叻，拍咁上下嘅戲過唔到佢哋，要畀大家睇好戲。年輕導演、編劇好重要，要鼓勵編劇創作要更加大膽，好似今次帶觀眾一齊笑一齊喊，未必要夾硬唧出笑話。」
衛詩雅邀米高出席婚禮
衛詩雅對於獲米高讚演技好，她開心表示：「有爸爸一句讚許，勝過千言萬語。」米高即笑着問她為何說是最後一年用姓衛切蛋糕？衛詩雅笑言：「我出年結婚，發咗帖畀爸爸你，你仲應承咗嚟。」對於投資電影票房獲佳績，楊受成笑言：「發夢都笑出口！」有信心打破香港電影票房紀錄。問到《破》片會否推出加長版？他笑言交給導演決定，因對方才是老闆。
