從影最多親熱戲 馬志威無福消受
與「一王兩后」合作 收穫友誼
馬志威與「一王兩后」王浩信、楊茜堯、林夏薇主演的無綫台慶劇《黑色月光》正在熱播，飾演十惡不赦「渣男」的馬志威享盡艷福，又與兩大視后有糾纏不清的感情瓜葛，更幾乎每一集都被女人埋身，從影逾十年的他直認今次是最多女對手的一次！
採、攝：記者 子棠
馬志威首次參演無綫劇，於《黑色月光》飾演的蔣基俊是一名富家公子，亦是壞事做盡的渣男，另一亮點是他艷福無邊，周旋於一群女人之中，不過與兩位視后楊茜堯和林夏薇的埋身肉搏就只有「叉頸」兼掌摑，還要跟視帝王浩信角力。不過馬志威表示拍得很放鬆：「第一日開工嘅第一個場口，導演就要求我狠狠咁對楊茜堯『叉頸』﹐最初我都有啲唔好意思，因為大家本身唔識，只係喺圍讀見過，但佢叫我放心『叉』過嚟，好專業。薇薇色誘我嗰一幕都同樣俾我『叉頸』，好多謝佢哋令我拍得好放鬆，所以私底下我稱呼楊茜堯做『怡哥』﹐因為佢好Man，係一個爽直嘅人；薇薇亦好可愛；浩信仲過癮，佢好玩得，會喺戲入面拋出一啲新穎想法，令劇集更加豐富，戲裏戲外都好Nice。今次合作最驚喜係賺到信任同友誼，事關同怡哥、薇薇、浩信、馬貫東等喺深圳拍咗兩個月，每日都見面，會一齊玩、食嘢同傾偈，大家培養咗好好嘅感情。」
電視尺度小兒科
提到與眾多女演員有激情戲，他坦言不享受：「相對電影尺度，今次絕對係小兒科！不過女對手嘅人數就係我從影以來最多嘅一次，事關多到我數唔晒。拍親熱戲其實好攰，一定要尊重對手，事先做好充足溝通，拍攝時又要遷就鏡頭，現場有好多工作人員睇住，所以真係唔享受！」
談到角色，他自有一番見解：「與其話蔣基俊係渣男，我會形容係變態嘅人，因為自小渴望父愛卻得唔到，形成扭曲性格不停去傷害人，其實係悲劇人物。現實中，壞人都唔會覺得自己壞，人嘅內心有好多唔同面貌，就算係一個好人有時都會想做壞事，一個壞人都會做好事，每一個角色如是，何況我哋演員做緊乜？就係做人。」可擔心情慾戲成焦點而被忽略演技？他大方說：「冇所謂，只要觀眾記住角色就得，作為演員，會感恩大家記得角色名，比起記得『馬志威』呢個名仲開心。」
