銀行大班買樓有啟示
湯文亮博士 紀惠集團行政總裁
有日與一班投資者午飯，知道有兩個銀行大班買樓，投資者對銀行大班買樓有不同意見，有人話，銀行應該暫時仍未願意借錢畀人買樓，唯有自己借畀自己，除了兩位銀行大班之外，亦有不少銀行職員買了樓，銀行自己做番自己生意，市民怕且要等多一會才有銀行借錢畀他們買樓。
有樂觀的投資者則話，銀行大班應該知道銀行很快放水，樓價必升，所以現在趁最後的機會買樓，否則蘇州過後冇艇搭，老實說，如果銀行唔打算放水，我相信銀行家唔敢買樓，否則在買樓之後銀行唔放水，樓價必跌，買了樓的銀行家顏面何存，如果要我押銀行家買樓對樓市影響是正面還是負面，我認為是正面，因為銀行家唔輸得，冇理由買了樓之後要打殘個樓市，令到自己變成輸家。
買樓和食大閘蟹一樣
講開又講，近日有朝早去茶餐廳，有客人話昨晚食大閘蟹公蟹，啲膏仍未凝結，蟹乸的膏又好似食鹹蛋黃，太實，冇乜意思。茶餐廳老闆於是話，有所謂九圓十尖，乸圓公尖，現在仍然是農曆9月，未適合食大閘蟹公，等多兩三個禮拜，就絕對唔同。
其實買樓同食大閘蟹都是一樣，最好等大造才買，現在樓市大造，尤其是細價樓，地產商減價蝕讓，小業主任鋤，銀主盤多到不得了，正式是當造，如果唔下定決心，隨時又買唔成，他日樓價回升，就只得一個恨字，雖然樓市可能會繼續下跌，但投資始終是要博，永遠唔博反而是輸家。
