與楊茜堯爭視后 定欣預告重演批㬹
坐開篷車谷《巾幗梟雄之懸崖》
胡定欣昨日與黎耀祥出席新劇宣傳活動，兩人坐開篷古董車出巡，氣勢十足。提到定欣與楊茜堯各自憑台慶劇爭視后，她笑言不會「讓賽」，因大家都有實力。對於網民重提她們早年在頒獎禮上疑似批㬹，定欣開玩笑稱可能跟楊茜堯在台慶頒獎禮上重現經典「批住上」。
視帝黎耀祥、視后胡定欣、羅天宇與陳曉華（Hera）等昨日出席台慶劇《巾幗梟雄之懸崖》的花車巡遊，黎耀祥與定欣穿戲服坐開篷古董車，其他演員則坐開篷巴士尾隨，途經中環至尖沙咀，吸引大批市民圍觀，氣勢十足。定欣透露其中一幕在橋上向黎耀祥表白後被拒，轉身離開時不慎跌落河：「呢場落水戲要一鏡落咁拍，會拍到全身，我要着住4吋高踭鞋由橋跌落水，都有十幾呎高，水下面好多石，祥哥好擔心我會拗柴，而且拍完全身濕晒，所以只可以拍一次。」
黎耀祥想再做視帝
提到定欣與楊茜堯日前出席郭晉安的生日派對，兩人狀甚老友，但網民重提她們14年前在台慶頒獎禮互藐的片段，定欣笑言：「嗰日我哋見面都有講係咪要再玩批㬹，因為以前有一個畫面流傳咗，好經典，我哋自己笑囉。好開心大家嘅劇都成為台慶劇，而且劇種唔同。（你哋兩個爭視后，會唔會讓賽？）唔使讓，大家互相支持，有實力就唔使讓，讓就唔係真正勝利者。（覺得邊個勝算高啲？）唔講，我套劇都未播，睇觀眾喜愛，我對自己套劇嘅角色有好多期待。（嚟緊台慶頒獎禮再重演批㬹？）批住上，哈哈！」
問到是否想再做視后？定欣說：「播咗先講。」黎耀祥即說：「我代佢答梗係想。」定欣反問他是否想再做視帝？他堅定說：「梗係想，等如你問我想唔想發達，就算知道發唔到達都想。（你哋會點谷劇爭視帝視后？）我哋宣傳唔係為爭視帝視后，係為套劇，聽日開直播，之後會去北京、上海宣傳。」
Hera表示有信心《巾》劇收視理想，因劇情很豐富，首五集非常精彩。天宇則稱對黎耀祥及定欣有信心：「我每次拍完自己嘅戲，都會留低睇祥哥演出，因為佢好有感染力，喺佢身上學到好多嘢。」兩人指宣傳時巿民很熱情，但天宇自嘲幫不到忙：「因為我冇咪喺手，講咗都冇人聽到，只可以同市民用眼神交流。」
