維拉防線曳 難「抗」拜仁
隊長缺陣 近況欠穩
今夜歐聯第2輪其中一場焦點戰，英超阿士東維拉主場對德甲拜仁慕尼黑。拜仁在新帥高柏尼帶領下開季踢出最強氣勢，球隊在歐聯早階段比賽一直所向披靡，近41場分組賽保持不敗，自2017年9月至今已贏出37場，近13個球季有12次最少打入八強！陣中逾半數主力都有豐富歐聯成功經驗，足以攻陷防線問題多多的維拉，拜仁作客讓半/一要撐上盤。（NOW 643台周四3:00am直播）
兩軍曾於歷史上對賽過一次，回帶到1982年歐冠盃決賽，維拉主場贏1:0捧盃。不過自此之後，該隊已經闊別這項歐洲頂級賽事長達42年，想不到今次回歸第2仗，便與拜仁冤家路窄。維拉在西班牙主帥艾美利帶領下明顯進步，英超由前季的第7名進步到上季第4名，取得歐聯入場券，並於上季殺入歐協聯四強。球隊今夏亦積極擴軍，開季後8場正式賽事贏出6場，包括歐聯首輪作客3:0擊敗瑞士年青人（不過該役初段極度受壓，比數未足反映戰況）。英超暫列第5位，但開季6場聯賽場場失波共失9球，包括主場對弱旅愛華頓亦失兩球，上輪末段被圍攻下，僅和升班馬葉士域治2:2，足見防線及近況都欠穩。隊長約翰麥甘尼因腿筋受傷缺陣，是維拉陣中最重要傷兵，今夜要抵禦目前全歐洲最弗的拜仁鋒線，形勢並不樂觀。
哈利卡尼傷癒 維拉煞星
拜仁在高柏尼帶領下，踢出開波即搶悅目進攻，開季7場正式賽事取得令人難以置信的30個入球。當中歐聯首輪9:2大炒薩格勒布戴拿模，創下拜仁歐聯的單場最高入球紀錄。球隊上輪在國家打吡對利華古遜，雖然在今季首次未能贏波，但比賽過程佔得上風，表現亦充滿說服力。拜仁前線可以強陣出擊，王牌射手哈利卡尼的足踝傷警報已告解除，已經復操無礙今夜擔正，這位英格蘭強鋒今季在7場比賽已交出10個入球及6個助攻，過往効力熱刺時6次到訪維拉公園，亦交出5個入球及兩次助攻，勢將繼續成為維拉煞星！配合穆斯亞拿、基拿比及大勇新援米高奧利斯攻堅，作客撕破維拉防線並不困難。
