炒家勢將主導樓市
湯文亮博士 紀惠集團行政總裁
今日跑步前做熱身，有跑友問樓市未來形勢如何，誰會主導樓市，本來我唔想講，但現實是很快就會發生，發生咗之後才講又會畀人話馬後炮，未來主導樓市的將會是炒家，不少物業將會以確認人形式轉讓，樓價升幅會好快，唔知到時政府會不會再出招，就算會都是五年後的事。
打算炒樓的炒家在買入一個單位的時候，會要求一個長成交期，大約半年至九個月，甚至可以畀多些少樓價，如果不能完成交易，業主可以殺訂，但無權追差價，我相信這類合約很快就會出現，當這類合約出現，樓價會上升得很快，小心小心。
新樓賣唔晒很正常
講開又講，有朝早去到茶餐廳，聽到有客人Order 蛋撻，不過就要新鮮出爐的，不要在餅櫃的，老闆冇意見，習以為常，到新鮮蛋撻出爐，一下子就賣了一半，老闆將新鮮蛋撻與原有的放在一個盤慢慢賣，大不了下午茶時間買一送一，一定可以賣晒。有客人問，點解唔等賣晒所有蛋撻才焗另一盤，咁樣就唔會浪費，老闆話，咁樣即是唔使做生意，大家都是貪新鮮，不過，當冇新鮮蛋撻供應，唔新鮮的都會賣得走。
情況就如日前兩個新樓盤開售，一個一Q清袋，一個差少少，其實，成績非常理想，因為買家知道仲有咁多新樓供應，如果買唔到，可能會等下個新樓盤，現在的成績，已經被預期好，不能太苛求。
