政府應考慮減印花稅
湯文亮博士 紀惠集團行政總裁
朝早去茶餐廳，有客人話有晚去了一間酒樓食飯，竟然要等位，原來酒樓免收加一，大家都覺得好抵食，所以搞到要排隊，客人問酒樓老闆，點解唔全單八折，效果應該仲好，酒樓老闆話，試過全單八折，效果一般般，反而認為以前酒樓收得太貴，現在免收加一，客人認為酒樓克己，沒有苛捐雜稅，所以咪幫襯。
老闆話，特區政府亦要考慮在非常時期行非常策略，現在樓宇成交量太低，新樓庫存太多，地產商不願意投地，影響政府收入，不如效法酒樓老闆免收加一，即是暫時唔收印花稅，或者減收一半，為期2至3年，待新樓庫存去得差不多，地產商恢復買地，才回復正常印花稅。
老闆講得冇錯，今屆政府官員比以往的夠膽很多，以撤辣為例，莫講話全撤，以往提都唔敢提，所以，以特事特辦，權宜之計來幫助樓市，最終得益都是香港。
唔賣樓會俾人鬧囤積居奇
講開又講，話說開例會時，同事話不少代理問我們賣樓，而且仲係信德中心寫字樓高層全層，冇遮擋海景，究竟堅定流，亦有口臭友問是否被銀行call loan。我話做投資者難，做出名投資者仲難，如果賣樓，就會問係咪頂唔順，是否被銀行call loan，如果唔賣，就會話我們囤積居奇，令到樓價上升，市民生活叫苦，其實，我賣樓的目的是希望做一個好價，令到其他業主不用賤價賣樓，或者可以令樓價止跌回升，一買一賣，賺了5億元，收了20年租，我話賺夠了賣樓都可以，老闆都冇意見。
