家輝認酬勞合理 香港電視台冇得比
與胡杏兒合演內地劇
影帝張家輝前晚出席新片首映禮，對於有傳他將再拍劇，家輝直認與昔日無綫班底合作，但一直拍慣電影，要重新適應拍劇模式。問到酬勞是否很吸引？他直言：「合理嘅酬勞，肯定唔係香港電視台畀嘅錢。」
由張家輝主演及馬浴柯執導兼演出的電影《重生》前晚舉行首映禮，家輝於台上表示自《掃毒》開始跟馬浴柯合作，之後再合作拍《怒潮》，經過兩次合作後已有一定默契，馬浴柯直言已構思新作，希望繼續與家輝合作。家輝大讚馬浴柯演而優則導，拍了不少能賺錢的好作品，雖然《重生》的拍攝預算比《怒潮》少，但發揮更大。馬浴柯笑指只要有家輝和阮經天參演，二人搞笑的性格間接令他的廣東話講得更好。
二人相識十多年，問馬浴柯可覺得家輝有所改變？他笑言：「沒有，他對電影的執念及熱愛還是一樣。」同樣身兼導演的家輝表示自己跟馬浴柯的方向不同：「佢係一個好成功嘅商業片導演，我就鍾意執導非主流電影，可以滿足吓自己。不過若然有機會再做導演，都希望邀請番佢嚟做演員。」馬浴柯即說：「希望呀！」
相隔20年再拍劇
有傳家輝相隔20年後再拍劇，與視后胡杏兒及內地演員曾舜晞合演內地劇《芻狗之血》，家輝承認說：「因為係以前TVB嘅製作班底，包括蘇萬聰同歐冠英分別做導演同總編劇，而呢個故事本來係外國嘅，但有好多地方買咗版權嚟改編，我諗如果自己去演，會有種傳火炬嘅感覺。依家喺我手上，千祈唔好令個版權丟臉。」問到演什麼角色？家輝說：「我演嘅角色為咗親情而犯錯，個雪球越滾越大，最後要想辦法修復。（同杏兒咩關係？）我哋冇感情線，只係工作嘅夥伴。（酬勞好吸引？）合理嘅酬勞，肯定唔係香港電視台畀嘅錢。（等同你一部電影片酬？）差唔多啦！」
家輝笑言看慣120分鐘的電影劇本，現在則要看超過20小時的劇本，令他回想以前拍劇的運作模式，要花時間重新適應。
