想搵靈魂伴侶 阿佘最愛叻人
擇偶條件越來越高
「工作狂」佘詩曼單身多年，一直相信緣分天注定。她覺得年紀越大，追求的事物就越不簡單，故渴望找到一個可以好好溝通的靈魂伴侶，並承認喜歡叻人：「希望對方可以令我進步！」
視后佘詩曼與內地演員陳坤昨日出席珠寶店宣傳活動，不過陳坤未有接受傳媒訪問。阿佘受訪時自爆四五歲已很貪靚，嚷着要媽媽帶她去穿耳窿和戴耳環。當她長大做暑期工首次出糧，差不多用了全部人工買心形鑽石耳環獎勵自己。問到是否人越大買的鑽石越大粒？她笑言：「咁要問珠寶店攞折扣喇！不過都會適可而止，做嘢辛苦都會買少少獎勵自己。（有冇男士送珠寶畀你？）我話冇你都唔信啦！屋企人都有男仔嘅。」
提到與她合演內地劇《延禧攻略》的吳謹言與洪堯驚爆結婚，阿佘指兩人由好朋友開始發展，順理成章結婚也是好事：「佢哋好襯，我有喺通訊群組同佢哋聯絡，反而見面好難，因為大家各有各忙。若然冇撞期嘅話，佢哋結婚擺酒我都會出席。」
唱歌捨易取難
單身多年的阿佘可擔心被催婚？她笑言：「唔怕，因為問都冇用！我依家以事業為重，遇到就遇啦！我覺得拍拖係點綴，人越大要求就越唔簡單。我注重溝通，希望搵到一個好好溝通嘅靈魂伴侶，再貪心啲就希望對方可以令我進步，所以我鍾意叻嘅人。」至於出席聚會時，可會叫友人介紹「筍盤」？她笑言：「有好嘢都被人擸晒啦，緣分天注定。」
問到何時開拍《新聞女王2》和電影版？阿佘表示最快也要明年初開拍：「聽聞係先拍電影版，不過我仲未收到劇本，只知《新聞女王2》會有新演員加入。」提到阿佘早前為林峯澳門騷擔任表演嘉賓，她笑言做一次嘉賓已足夠：「都係自己衰，原本可以揀一首易唱嘅歌，但難得有機會，又覺得鄭秀文嘅歌好聽，雖然難唱，但不妨試吓。（林峯畀你超過100分！）佢夠膽唔讚我？0分都要講100分！」
