有望取消追差價
湯文亮博士 紀惠集團行政總裁
有老友話打算在減息前去買新樓，問有乜嘢要特別注意，我話現在新樓交投仍然疏落，況且不少新樓盤已經接近完成，如果買新樓，可以要求地產商取消追差價條款，地產商可能會接受，一於大膽假設，小心求證。
老友唔明白點解以往地產商唔會取消追差額條款，其實都是市場決定，超額幾十倍認購，一個唔買另一個買，根本唔憂賣，點解要取消，其次是當時距離交樓年期有兩年，唔追差價對地產商來說有一定風險，現在已經有很多新樓已經是現樓，取消追差價風險亦不大，所以，地產商未必不會考慮這個要求。
租樓人士應鼓勵別人買樓
講開又講，近日有一篇文章分析租樓與買樓，結果就是買樓的人很笨，我唔批評文章是錯抑或是對，但有一點可以肯定，撰文的人是沒有樓，所以才話租樓好過買樓，其實，佢咁樣講即是搵自己老襯，鼓勵其他人租樓，即是為自己增添不少競爭對手，甚至現在租用的單位，都會因為有人畀更高租金而被業主踢走，老實說，蠢人我見得多，不過未見過咁蠢。
現在租樓的人應該撰文叫人買樓，多人買樓可以令到現在租樓的人變成業主，不會同自己競爭，如果有人買樓收租就更加好，租盤供應增加，租金自然下跌，在過去20個月，叫人租樓唔好買樓的人太過成功，即使樓價下跌，租金仍然上升，叫人租樓唔好買樓的人是否很蠢。
