現在賣樓多數非業主
湯文亮博士 紀惠集團行政總裁
有朝早開例會，有同事話終於明白點解有咁多低於市價的樓盤成交，原來賣樓的人並不是業主，而是銀主，至於賣樓的原因並不是蝕得太多，被財仔收樓，而是洗腳唔抹腳，用錢太多，並且一直以貸冚債，財仔見樓價下跌，恐怕蝕入肉，一於沒收物業做銀主盤出售，不一定要收回全部貸款，蝕少少都可以接受，所以，近日有咁多低價成交。
銀主與業主賣樓真的是天與地，業主會斤斤計較樓價，攞得幾多得幾多，銀主就不同，最緊要是夠冚業主所欠的債項，如果夠冚，一定唔會斤斤計較，本來財仔的銀主盤早已有買家，不過，近日買家可能已經食飽，財仔不得已才會將物業交給代理推銷，打算買樓的人或者可以搵到一個適合自己的單位。
最緊要唔好出現爛尾樓
講開又講，有日晚飯時，老婆問我最擔心香港樓市出現什麼情況，我諗都唔使諗就話爛尾樓，現在全世界有很多地方都出現爛尾樓，加拿大、澳洲等亦不例外，很多人不以為然，以為唔買樓花就冇事，其實，爛尾樓影響當地物業市場信譽，並不是一個地產商咁簡單，某一個地盤爛尾，就算政府唔幫，其他地產商都會幫，大家都明白唇亡齒寒道理。
很多人唔明白政府點解突然間撤辣，而且是全撤，其實政府知道，如果唔撤辣，一定會影響樓市成交量，導致樓價急速下跌，最終會有不少買了新樓的人撻訂，地產商停止興建，最後出現爛尾樓，所以，政府是被迫撤辣，並不是幫炒家。
