陳甜甜溫柔搞笑 兩師姐點名讚
王怡然否認負面新聞影響工作
昨日15位候選佳麗出席港姐活動，同場還有師姐郭柏妍與劉穎鏇等，期間要幾位師姐選出心目中的佳麗，結果（9）陳甜甜最得寵，同時獲兩位師姐劉穎鏇及郭柏妍公開點名睇好，她開心表示可能因自己的性格溫柔又喜歡搞笑，故得到兩位師姐賞識。
15位港姐候選佳麗與師姐黃嘉雯、郭柏妍、劉穎鏇、王怡然及「聲夢小花」詹天文昨日出席《2024香港小姐競選》主題曲MV首播記者會。陳甜甜獲劉穎鏇及郭柏妍讚賞，（11）梁嘉莹則憑小麥膚色得到黃嘉雯青睞。陳甜甜感謝兩位師姐賞識：「可能我性格溫柔，大方又搞笑，大家開心就好。（佢哋讚你努力講廣東話。）我好努力講，唔驚大家笑我，不過擔心會發錯音變粗口，我每次都好注意。（師姐讚你，覺得打咗強心針？）我知自己廣東話講得唔好，覺得唔好意思，但大家對我好包容同鼓勵。」
楊梓瑤選陳甜甜做友誼小姐
談到即將開始網上投票，她會在社交網上載自己練廣東話的片段，亦呼籲親友投她一票。而梁嘉莹讚黃嘉雯是經驗豐富的師姐：「希望通過我令其他皮膚黑嘅女仔更加多自信，我好鍾意自己嘅膚色。其實無論高矮肥瘦，每個人都係獨一無二。」
（14）楊梓瑤獲王怡然睇好，她表示很開心：「因為我好鍾意佢，佢笑得好甜，冇諗過佢會揀我。（但佢之前有負面新聞。）我知道，但唔了解，佢係好女仔就夠。」問到若要選友誼小姐會揀誰？她表示必定選陳甜甜：「因為之前我比較少鏡頭，所以唔係咁開心，甜甜就喺社交網放咗我嘅相，想畀多啲人認識我，佢真係好sweet。」
去年王怡然當選亞軍不久，其父母被爆欠債千萬，之後她一直「潛水」，直至最近才「復出」試水溫。問到快將卸任的心情如何？她表示心情好放鬆，之前忙於讀書，畢業後會投入演藝工作，現正等公司安排。可覺得受之前負面新聞影響工作？她表示覺得少曝光跟讀書有關。再問父親欠債是否解決？她只說：「都係以前嘅事。（解決咗？）要問佢，我以為上次訪問完就完咗。（爸爸喺香港？）今日就……佢唔喺（香港），屋企人啲嘢唔講。」
